საქართველოსა და უცხოეთში ქართული დიასპორის დღესთან, 27 მაისთან დაკავშირებით დაგეგმილი ღონისძიებები გააცნო დიასპორის საკითხებში სახელმწიფო მინისტრმა, გელა დუმბაძემ დეპუტატებს დიასპორისა და კავკასიის საკითხთა კომიტეტის დღევანდელ სხდომაზე. ღონისძიებების პროექტები სახელმწიფო მინისტრის აპარატის მიერაა შემუშავებული.
გელა დუმბაძემ პროგრამებში სტუმრად მოწვეული ქართული დიასპორული ორგანიზაციების ჩართულობაზე ისაუბრა.
მისი თქმით, 27 მაისს, დიასპორის დღის ფარგლებში დაგეგმილია პირველი პროფესიული დიასპორული ფორუმის – ,,გაუზიარე გამოცდილება სამშობლოს” ჩატარება. როგორც სახელმწიფო მინისტრმა აღნიშნა, ფორუმი მიზნად ისახავს სამშობლოსთვის დიასპორული გამოცდილების გაზიარებას, დიასპორასა და სამშობლოს შორის პარტნიორული ურთიერთობების ჩამოყალიბებას, როგორც სახელმწიფო ინსტიტუტებთან, ისე კერძო და სამოქალაქო სექტორთან.
„ღონისძიებაში მონაწილეობენ საზღვარგარეთ მოქმედი დიასპორული ორგანიზაციების ხელმძღვანელები, სხვადასხვა პროფესიის წარმატებული თანამემამულეები, სასულიერო პირები, საქართველოს ხელისუფლებისა და კერძო სექტორის წარმომადგენლები, საერთაშორისო და არასამთავრობო ორგანიზაციები, აკადემიური წრეების წარმომადგენლები“, - განაცხადა გელა დუმბაძემ.
მისი თქმით, ფორუმის ოფიციალური გახსნითი ცერემონიის შემდეგ, მონაწილენი დაიყოფიან ინტერესთა სფეროების – ჰუმანიტარული და სოციალურ-პოლიტიკური მეცნიერების, მედიცინის, დიასპორული ორგანიზაციების, ახალგაზრდობისა და სპორტის, დიასპორული ინვესტიციების, მედიისა და ისტორიული დიასპორის ჯგუფებად.
„დიასპორის პროფესიული პოტენციალის სამშობლოს სასიკეთოდ მიმართვის უზრუნველყოფის მიზნით, ფორუმის მონაწილეები იმსჯელებენ კონკრეტულ სფეროში არსებულ გამოწვევებზე, ეფექტური თანამშრომლობის გზებზე. თემატურ ჯგუფებში მოხსენებების შემდეგ, გაიმართება დისკუსია და დებატები, რათა გამოიკვეთოს დიასპორის ინიციატივები არა მხოლოდ მოკლევადიანი, არამედ პრობლემათა გადაჭრის ფართომასშტაბური, მდგრადი სტრატეგიის ჩამოსაყალიბებლად, რასაც სამომავლოდ ხელშესახები რეალური შედეგები მოჰყვება“-, აღნიშნა გელა დუმბაძემ.
როგორც სხდომაზე აღინიშნა, დიასპორის დღის ფარგლებში, ასევე, დაგეგმილია სხვადასხვა ღონისძიება – საზღვარგარეთ მოღვაწე მხატვართა ნამუშევრების გამოფენა, კლასიკური მუსიკის კონცერტი, ლიტერატურულ და სტუდენტურ კონკურსებში გამარჯვებულთა დაჯილდოება, საქართველოს კათოლიკოს–პატრიარქთან შეხვედრა, სამშობლოში განხორციელებულ ინოვაციათა გასაცნობი ტური.
