,,ერთიანი ნაციონალური მოძრაობის” წევრის გოკა გაბაშვილის განცხადებით, 26 მაისს აღლუმის ჩატარებაზე უარის თქმა ნიშნავს, ხელისუფლების მხრიდან სიძულვილს ქართული არმიის მიმართ.
,,გადაწყვეტილება, რომ წელსაც არ ჩატარდეს აღლუმი, არის ძალიან არასწორი გადაწყვეტილება. ეს უკვე იღებს რაღაც ძალიან მავნე და არასაჭირო ტრადიციის სახეს და ეს ახასიათებს ამ ხელისუფლებას, როგორც ხელისუფლებას, რომელსაც სძულს საკუთარი სახელმწიფო ინსტიტუტები. კერძოდ, ქართული არმია, ქართული ჯარი და ეს გამოიხატა კიდევაც, როდესაც საზოგადოება თვლის, რომ ყველა ინსტიტუტი არის ძალიან დასუსტებული. ყველა ინსტიტუტი ამ ხელისუფლების ხელში განიცდის დაკნინებას და დისკრედიტაციას,” - განაცხადა გაბაშვილმა.
თავდაცვის სამინისტროს ინფორმაციით, საქართველოს შეიარაღებულმა ძალებმა დამოუკიდებლობის დღისათვის მზადება დაიწყო. 26 მაისს დამოუკიდებლობის დღისადმი მიძღვნილ სამხედრო-საზეიმო ღონისძიებებში ავიაციაც ჩაერთვება.
ღონისძიებებთან დაკავშირებით, თბილისში 19, 20 და 25 მაისს რეპეტიციები ჩატარდება და 19 მაისს, 12:00 საათიდან 14:00 საათამდე, ერთი ერთეული "იროკეზის" ტიპის შვეულმფრენი თავისუფლების მოედნიდან მიხეილ მესხის სახელობის სტადიონის გავლით თბილისის ზღვის მიმართულებით სავარჯიშო ფრენას განახორციელებს.
20 მაისს, 13:00 საათიდან 15:00 საათამდე, "იროკეზის" ტიპის შვეულმფრენი და L-39 ტიპის თვითმფრინავი "ალბატროსი" თავისუფლების მოედნიდან მიხეილ მესხის სახელობის სტადიონის გავლით გლდანის რაიონის მიმართულებით საკოორდინაციო შემოფრენას შეასრულებენ.
25 მაისს, 12:45 საათიდან 14:30 საათამდე, გენერალური რეპეტიცია ავიაციის მონაწილეობით იგეგმება. 3 ერთეული "იროკეზის" ტიპის შვეულმფრენი, 3 ერთეული L-39 ტიპის თვითმფრინავი "ალბატროსი" და 3 ერთეული SU-25 ტიპის თვითმფრინავი "მიმინო" დედაქალაქის თავზე თავისუფლების მოედნიდან მიხეილ მესხის სახელობის სტადიონისა და გლდანის რაიონის გავლით თბილისის ზღვის მიმართულებით გადაიფრენენ.
საქართველოს დამოუკიდებლობის დღეს ფიცის მიღების ცერემონიალთან დაკავშირებით, ასევე, თავისუფლების მოედანზე დაგეგმილია რეპეტიციები.
23 მაისს, 06:00 საათზე, თავისუფლების მოედანი და მისი მიმდებარე ტერიტორია გადაიკეტება. რეპეტიცია დაახლოებით 12:00 საათამდე გაგრძელდება.
25 მაისს, 11:00 საათიდან, სავარაუდოდ, 18:00 საათამდე გენერალური რეპეტიცია იგეგმება. თავისუფლების მოედანსა და რუსთაველის გამზირზე ტრანსპორტის მოძრაობა 26 მაისს ღონისძიებების დასრულებამდე შეიზღუდება.
