საქართველოს რეგიონული განვითარებისა და ინფრასტრუქტურის სამინისტროსა და ავსტრიის ტრანსპორტის, ინოვაციებისა და ტექნოლოგიების ფედერალურ სამინისტროს შორის ურთიერთგაგებისმემორანდუმი გაფორმდა.მას ხელი საქართველოს მხრიდან მინისტრმა, ნოდარ ჯავახიშვილმა, ავსტრიის მხრიდან კი - ავსტრიის ელჩმა საქართველოში, აქსელ ვეჰმა მოაწერეს.
მემორანდუმი ითვალისწინებს მხარეებს შორის თანამშრომლობას ნარჩენების მართვის, საგზაო ინფრასტრუქტურის და წყალმომარაგების ტექნოლოგიების დარგში. ეს ხელს შეუწყობს მდგრადი ინფრასტრუქტურის განვითარებას და იმ პროგრამების განხორციელებას, რომელიც ორიენტირებული იქნება მხარეებს შორის ბიზნეს პარტნიორობის გაღრმავებაზე.
მემორანდუმის ფარგლებში დაგეგმილია ისეთი ღონისძიებების განხორციელება, როგორიცაა:
- არსებული ტექნიკის მოვლა-შენახვა და მოდერნიზება;
- ტექნიკური დახმარება ექსპერტების, სპეციალისტებისა და მაღალკვალიფიციური ტექნიკოსების მიერ;
- შესაბამის სფეროებში ტრენინგების ჩატარება სხვადასხვა რგოლის მენეჯმენტის და სხვადასხვა პროფესიების მქონე სპეციალისტებისთვის.
მემორანდუმის განხორციელების მიზნით შეიქმნება ერთობლივი სამუშაო ჯგუფი, რომლის შემადგენლობაში იქნებიან მხარეების მიერ დასახელებული პასუხისმგებელი უწყებების წარმომადგენლები. სამუშაო ჯგუფის შეხვედრები პერიოდულადსაქართველოსა და ავსტრიაში გაიმართება.
