საპარლამენტო უმრავლეობის წევრი, მცხეთის მაჟორიტარი დეპუტატი დიმიტრი ხუნდაძე სოციალურ ქსელში განცხადებას ავრცელებს და ბოლო პერიოდში მისი მისამართით გამოთქმულ ბრალდებებს ეხმიანება.
დეპუტატის განცხადებით, ის პოლიტიკიდან წასვლას იქამდე არ აპირებს, სანამ მცხეთის რაიონს არ მოაშორებს მხოლოდ ფულისთვის და პირადი სარგებლისთვის მოსულ ჩინოვნიკებს. ,,ჯი-ეიჩ-ენი” ხუნდაძის განცხადებას უცვლელად გთავაზობთ:
,,ბოლო პერიოდში მცხეთის რაიონის მუნიციპალიტეტში, კერძოდ, საკრებულოში განვითარებულმა მოვლენებმა ადგილობრივი მოსახლეობა აღაშფოთა. ათეულობით ადამიანი მირეკავს და მთხოვს, კომენტარი გავაკეთო ჩემს მიმართ რამდენიმე პირის მიერ გამოთქმულ ბინძურ და მდაბიო ცილისწამებაზე, შეკვეთილ გადაცემებზე და დიდი ვაივაგლახით შეთითხნილ მასალებზე. მივმართავ მცხეთელებს და მცხეთის რაიონის მკვიდრთ: პოლიტიკა ბრძოლის და მუდმივი ჭიდილის არენაა. მთავარია, ვინ რისთვის და რა მიზნებისთვის იბრძვის. თქვენ კარგად იცნობთ მუდმივად სხვადასხვა პარტიებში მოხეტიალე ამ ხალხს, იცით მათი განზრახვაც. იცით ისიც, რომ მათ ხალხის ინტერესებთან საერთო არაფერი აქვთ. მათი ერთადერთი მიზანი პირადი კეთილდღეობაა. თქვენც სწორედ ამის გეშინიათ, ერთად დაწყებული ბრძოლა უზნეობის, უსამართლობის და კორუფციის წინააღმდეგ, უშედეგოდ არ დამთავრდეს. გარწმუნებთ, თქვენი შიში უსაფუძვლოა. სარეველას მოსპობა ერთი ხელის მოსმით ვერ ხერხდება, მას მრავალჯერადი შეწამვლა სჭირდება.მიუხედავად იმისა, რომ არასოდეს მიოცნებია პოლიტიკოსობაზე, დღეს მე სხვასთან ერთად ჩვენი ქვეყნის ბედს განვაგებ. რამდენი წელიც არ უნდა დამჭირდეს, არ ვაპირებ პოლიტიკიდან წასვლას მანამ, სანამ ჩვენს საერთო მიზანს არ მივაღწევთ და უპირველეს ყოვლისა, მცხეთასა და მცხეთის რაიონს არ მოვაშორებთ მხოლოდ ფულისთვის და პირადი სარგებლისთვის მოსულ ჩინოვნიკებს და ხალხს არ მივცემთ უკეთესი ცხოვრების საშუალებას. ჩემთან ღია დაპირისპირების ერთადერთი მიზეზიც ეს არის - მცხეთაში ვეღარ ახერხებენ ფულის კეთებას. ჩემი პოლიტიკაში ყოფნის ერთადერთი მიზანიც ეს არის - ბოლომდე ვებრძოლო ხალხის ხარჯზე უკანონობით და უზნეობით მოპოვებულ პირად გამდიდრებას. ბრძენ კაცს უთქვამს, მებრძოლი მაშინ ხარ, თუკი ბრძოლას იმდენჯერ იწყებ, რამდენჯერაც გჭირდება. ვინც ისევ მებრძოლებად თვლით თავს, ვინც არ დაიღალეთ უსამართლობასთან ბრძოლაში და ვისთვისაც სიცოცხლეზე მეტად ძვირფასია საკუთარი სინდის-ნამუსი, დადექით მედგრად და ჩათვალეთ, რომ ყოველი დღე ახალი ბრძოლის დასაწყისია. ბოლომდეა მისაყვანი ჩვენს მიერ დაწყებული საუკეთესო პროექტები და ასევე დაგეგმილი გვაქვს ბევრი ახალი მნიშვნელოვანი პროექტის განხორციელებაც. მე არ დავღლილვარ ამ ბრძოლაში, მიუხედავად იმისა, რომ ჯოჯოხეთური შრომა მაქვს. მჯერა, რომ არც თქვენ დაიღალეთ. საერთო მიზანთან ძალიან ახლოა. მერწმუნეთ, იმაზე დიდი ბედნიერება არ არსებობს, ვიდრე ის, რომ საკუთარ ხალხს და ქვეყანას ემსახურები!”, _წერს სოციალურ ქსელში ხუნდაძე.
