ბრიუსელში, ევროპის საბჭოს მინისტერიალზე, საქართველოს საგარეო საქმეთა მინისტრი თამარ ბერუჩაშვილი სიყვით გამოვა.
საგარეო უწყების ინფორმაციით, მინისტერიალის დღის წესრიგის ერთ-ერთ საკითხს წარმოადგენს ევროპაში არსებული კონფლიქტები, სადაც ყურადღება გამახვილებული იქნება რუსეთის მიერ უკრაინასა და საქართველოში საერთაშორისო სამართლის პრინციპების დარღვევის თაობაზე. ამასთანავე, საქართველოს ოკუპირებულ რეგიონებში ადამიანის უფლებათა მდგომარეობის მონიტორინგის მიზნით ევროპის საბჭოს მიერ შესაბამისი მექანიზმების გამოყენების მნიშვნელობაზე.
მინისტერიალზე ასევე განხილული იქნება ევროპის საბჭოს გენერალური მდივნის ანგარიში ევროპაში დემოკრატიის, ადამიანის უფლებებისა და კანონის უზენაესობის კუთხით არსებული მდგომარეობის შესახებ. ამასთანავე, ორგანიზაციის წევრი ქვეყნების საგარეო საქმეთა მინისტრები განიხილავენ ტერორიზმთან დაკავშირებულ პრობლემებს და ევროპის საბჭოს როლს ამ მიმართულებით.
ასევე, მიღებულ იქნება გადაწყვეტილება საქართველოში კონფლიქტის შესახებ ევროპის საბჭოს გენერალური მდივნის მე-11 კონსოლიდირებული ანგარიშის ცნობად მიღების თაობაზე.
