ასოცირების შეთანხმება არავითარ შემთხვევაში არ არის ანტიშეთანხმება რომელიმე სახელმწიფოს წინააღმდეგ, - ამის შესახებ ავსტრიის პრეზიდენტმა ჰაინც ფიშერმა საქართველოს პრეზიდენტ გიორგი მარგველაშვილთან შეხვედრის შემდეგ გამართულ ერთობლივ პრესკონფერენციაზე
მან მადლობა გადაუხადა ქართველ კოლეგას საქართველოში მოწვევისთვის, რაც, მისი თქმით, ადასტურებს, რომ ორივე მხარე მოწადინებულია, რეალურად განახორციელოს კონკრეტული ნაბიჯები. ჰაინც ფიშერის თქმით, მისი ვიზიტის ფარგლებში გაფორმდება რამდენიმე მემორანდუმები სოფლის მეურნეობის და გარემოს დაცვით სფეროებში.
"გულწრფელად უნდა ვთქვა, რომ ჩვენი ეკონომიკური თანამშრომლობა დაიწყო ძალიან დაბალ დონეზე, მაგრამ ახლა ნამდვილად გვაქვს პრეტენზია, რომ ყოველწლიურად, სერიოზულად განვავითაროთ ეს ურთიერთობები. ასოცირების შეთანხმებაზე ბატონმა პრეზიდენტმა უკვე ისაუბრა. ჩვენ მხარს ვუჭერთ ამას. ეს არის გონივრული ღონისძიება. ჩვენი პოზიცია არის ცალსახა, რომ ასეთი ტიპის ასოცირების შეთანხმება აახლოებს სახელმწიფოებს, მათ ეკონომიკას და არამც და არამც არ არის მიმართული რომელიმე მესამე ქვეყნის წინააღმდეგ. როგორც ჩვენ გვესმის ასოცირების შეთანხმება, მივიღეთ რა მონაწილეობა შესაბამის მოლაპარაკებებში, ეს არის შეთანხმება კონკრეტულ სახელმწიფოსთან და არამც და არამც ანტიშეთანხმება რომელიმე სახელმწიფოს წინააღმდეგ, რომელიც გამორიცხავს, თამაშგარეშე აყენებს რომელიმე სხვა სახელმწიფოს. იმავდროულად, შავი ზღვის რეგიონი არის ძალიან მნიშვნელოვანი რეგიონი, რომელსაც აქვს ერთობლივი ნიშნები, თუმცა ამავდროულად აქვს ერთობლივი ნიშნები ევროკავშირის მიმართ და სწორედ ამ ერთობლიობაზე უნდა ვიყოთ მაქსიმალურად ორიენტირებული. საქართველო არის ძალიან მნიშვნელოვანი ქვეყანა ავსტრიისთვის თანამშრომლობის განვითარების თვალსაზრისით", - განაცხადა ჰაინც ფიშერმა.
მისივე თქმით, 2017 წელს ავსტრია ეუთოს თავმჯდომარე ქვეყანა გახდება, ამ ორგანზიაციას კი აქვს უდიდესი პასუხისმგებლობა მშვიდობის შესანარჩუნებლად და მაქსიმალურად შეეცდება მშვიდობის უზრუნველყოფას, მათ შორის, საქართველოსთან ორმხრივი თანამშრომლობის კუთხით.
