ქართულმა მხარემ მადლობა გადაუხადა ავსტრიას საქართველოს ტერიტორიული მთლიანობისა და ევროინტეგრაციის პროცესის მხარდაჭერისთვის. ამის შესახებ საქართველოს პრეზიდენტმა გიორგი მარგველაშვილმა თავის ავსტრიელ კოლეგასთან, ჰაინც ფიშერთან შეხვედრის შემდეგ გამართულ ერთობლივ პრესკონფერენციაზე განაცხადა.
საქართველოს პრეზიდენტის ინფორმაციიით, შეხვედრაზე საუბარი შეეხო როგორც ორმხრივ, ისე საერთაშორისო კონტექსტებს. გიორგი მარგველაშვილის თქმით, ეს არის ავსტრიის პირველი ოფიციალური დელეგაცია საქართველოში და თანამშრომლობას, რომელიც ორ ქვეყანას შორის არსებობს, აღნიშნული ვიზიტი ახალ იმპულსს მისცემს.
"ჩვენ ვისაუბრეთ შავი ზღვის რეგიონის განვითარების შესახებ. აქ ჩვენი ავსტრიელი მეგობრები არიან ძალიან აქტიურები, სწორად ხედავენ საქართველოს მნიშვნელოვან როლს და ეხმარებიან იმ მიმართულებით, რომ შავი ზღვის ეს რეგიონი განვითარდეს როგორც თანამშრომლობის, მეგობრობისა და შესაძლებლობების რეგიონი. ჩვენ ვისაუბრეთ რეგიონის საფრთხეების შესახებაც. ის სირთულეები, რომელიც შექმნილია რეგიონში, ის დაძაბულობა, რომელიც არის უკრაინაში, დაძაბულობა, რომელიც იყო საქართველოში – ყოველივე ეს ხელს უშლის რეგიონის მშვიდობიან განვითარებას. ბუნებრივია, ჩვენ ვხედავთ, რომ ავსტრია მყარად უჭერს მხარს ჩვენი ქვეყნების მშვიდობიან განვითარებას. ჩვენ ვისაუბრეთ იმ შესაძლებლობების შესახებ, რაც საქართველოს ექმნება ასოცირების ხელშეკრულებით და იმ ეკონომიკური პოტენციალის შესახებ, რაც ჩვენს ქვეყანას გააჩნია. ჩვენ გამოვთქვით იმედი, რომ რიგაში მიღებული იქნება ნათელი გადაწყვეტილებები საქართველოს ევროპაში მომავალი ინტეგრაციის თაობაზე და იმ სამუშაოს თაობაზე, რომელიც საქართველომ, როგორც სახელმწიფომ, ბოლო პერიოდის განმავლობაში განახორციელა. ასევე, ვისაუბრეთ იმ ბიზნეს თანამშრომლობის შესახებ, რომელიც ავსტრიასთან გვაქვს და მადლიერება გამოვხატეთ იმ პროექტებისთვის, რომელსაც ჩვენი ავსტრიელი პარტნიორები აქ ახორციელებენ", - განაცხადა პრეზიდენტმა.
ავსტრიის პრეზიდენტის ვიზიტის ფარგლებში, ხვალ საქართველო-ავსტრიის ბიზნესფორუმი გააიმართება.
