საპარლამენტო უმრავლესობის წევრი ზაქარია ქუცნაშვილი მაღალი თანამდებობის პირებისთვის, მიმდინარე საბიუჯეტო წლის განმავლობაში, პრემიების აღების უფლების შეზღუდვას მოითხოვს. ამის შესახებ მან დღეს გამართულ პრესკონფერენციაზე განაცხადა.
მისი თქმით, დეპუტატ დიმიტრი ხუნდაძის მიერ რამდენიმე დღის წინ გამოთქმულ მოსაზრებას საკანონმდებლო ინიციატივის სახე უნდა მიეცეს.
,,მინდა, ამ კვირაში ეს მოსაზრება ვაქციო საკანონმდებლო ინიციატივად, რითაც შევეცდებით, ჩვენი მოქალაქეების ხარჯების გაზრდის კვალობაზე, შევამციროთ ჩინოვნიკების შემოსავლები. ლარის დევალვაციამ გაზარდა ჩვენი მოქალაქეების ხარჯები. ადეკვატური და შესაბამისი იქნება, თუ შევამცირებთ ჩინოვნიკების შემოსავლებს" - განმარტა ზაქარია ქუცნაშვილმა.
მისი ინფორმაციით, საკმაოდ ფართო იქნება იმ პირთა წრე, ვისაც უნდა შეეხოს პრემიების აღების უფლების შეზღუდვა. მათი ვინაობის წინასწარ დაანონსებისგან დეპუტატი თავს იკავებს, თუმცა აცხადებს, რომ მის სიაში დაბალი რანგის საჯარო მოხელეები არ შევლენ.
ზაქარია ქუცნაშვილი დარწმუნებულია, რომ მის ინიციატივას კოლეგები მხარს დაუჭერენ, რადგან პარლამენტმა თვითონ შექმნა პრემიაზე უარი თქმის მაგალითი და ამ შემთხვევაში, მორალური უფლება აქვს, სხვა მაღალი თანამდებობის პირებს მოსთხოვოს ანალოგიურ რეჟიმში ჩაიყენონ თავი.
ზაქარია ქუცნაშვილი აცხადებს, რომ პრემია ასევე არ აუღია პრეზიდენტ გიორგი მარგველაშვილსაც.
