პოლიტოლოგი რამაზ საყვარელიძე რიგის სამიტზე, ევროკავშირის მხრიდან, საქართველოს მისამართით ვიზალიბერალიზაციის საკითხთან დაკავშირებით, კონკრეტული ქმედითი ნაბიჯების გადადგმას არ ელის. ამის მიზეზად ,,ჯი-ეიჩ-ენთან” საუბარში, საყვარელიძე საერთაშორისო ასპარეზზე შექმნილ ვითარებას ასახელებს,
თუმცა, პოლიტოლოგი აცხადებს, რომ საქართველოს მიერ, ბოლო დროს მიღწეული პროგრესი, ევროკავშირის მხრიდან, სიტყვიერად აუცილებლად პოზიტიურად შეფასდება.
,,იმედგაცრუება თავად იმედზეცაა დამოკიდებული. კაცი ფანჯრის რაფაზე რომ დადგეს და გაფრენის, იმედი ჰქონდეს და გადახტომის შემდეგ, იმედი რომ გაუცრუვდება ვისი ბრალი იქნება? საერთაშორისო ურთიერობებთან დაკავშირებით, იმედებს ისე ვაწყობთ, თითქოს, ეს მხოლოდ ჩვენი გადასაწყვეტია და არ ვითვალისწინებთ საერთაშორისო ვითარებას მოცემულ მდგომარეობაში. ის რაც დღეს ხდება, სადაც საკვანძო რგოლი უკრაინაა, არ ქმნის საფუძველს, რომ საქართველოს ჰქონდეს ევროპული მიმართულებით წინსვლის იმედი, არა ჩვენს გამო, არამედ შექმნილი საერთაშორისო მდგომარეობის გამო”, - განაცხადა საყვარელიძემ.
კითხვაზე - ელოდება თუ არა რაიმე სახის პოზიტიურ შედეგებს რიგის სამიტიდან, იგი აცხადებს:
,,შეფასებაში პროგრესი იქნება, რადგან ობიექტურად, საქართველოს მხრიდან პროგრესი არსებობს, მაგრამ ამ კუთხით ნაბიჯები რომ გადაიდგას, ამის სურვილი უნდა ჰქონდეს მეორე მხარესაც. ახლა ვხედავთ, რომ ის უკრაინის თემაშია ბოლომდე ჩაფლული და ვერ ამოდის იქიდან და იმის ნიშნებიც კი არის, რომ გარკვეულ კომპრომისებზეც წავიდეს”, _აცხადებს საყვარელიძე ,,ჯი-ეიჩ-ენთან” საუბარში.
შეგახსენებთ, რომ რიგის სამიტი 21-22 მაისს გაიმართება.
