თბილისის მერის დავით ნარმანიას თქმით, თბილისში დაზიანებული გზის მონაკვეთები მოწესრიგდება. ამის შესახებ ნარმანიამ გადაცემა „20 30“ ეთერში განაცხადა.
„დამატებით 4 მილიონის ტენდერი გამოცხადებულია და საბოლოო ფინალისკენ მიდის. არსებული დაზიანებული მონაკვეთები, რომლებიც დისკომფორტს უქმნის მძღოლებს გადაადგილების დროს, მოწესრიგდება“, - განაცხადა ნარმანიამ.
თბილისის მერმა ასევე აღნიშნა, რომ „ქარვასლასთან“ საგზაო სამუშაოები კონტრაქტორმა უნდა დაასრულოს ივნისის ბოლომდე. „იქ ძალიან რთული მონაკვეთი იყო. ჯერ გამოიცვალა წყლის სისტემა, შემდეგ - სანიაღვრე“, - განმარტა ნარმანიამ.
ამასთანავე მერმა ხაზი გაუსვა, რომ „წინაარმდეგ შემთხვევაში კონტრაქტორთან ურთიერთობა გაწყდება და ის ძალიან მკაცრად დაისჯება“.
