საქართველო სთავაზობს ინვესტორებს სამართლებრივ უსაფრთხოებას, ხარისხიან, გამჭვირვალე და პროგნოზირებად კანონებს, - ამის შესახებ განცხადება საქართველოს პრემიერ-მინისტრმა ირაკლი ღარიბაშვილმა EBRD-ს ყოველწლიური შეხვედრის გახსნაზე გაკეთა, რომელსაც წელს, საქართველო პირველად მასპინძლობს.
როგორც ღარიბაშვილმა შეხვედრისას აღნიშნა, საქართველო ინვესტორებს სთავაზობს ასევე, ჯანსაღ საარბიტრაციო პროცედურებს, სანდო სასამართლო და სანოტარო სისტემებს, სასამართლო განჩინებათა სწრაფ და ეფექტურ აღსრულებას, საჯარო მონაცემთა ხელმისაწვდომობას და ინფორმაციის ღიაობას, ხელმისაწვდომ, სწრაფ და გამჭვირვალე საჯარო მომსახურებას.
”გონივრული, მინიმალური და მიზანდასახული რეგულაციების დაწესებამ, ქვეყანა აქცია ჯანსაღი ბიზნესის კეთებისა და წარმოების ჰაბად. წინასწარი გათვლებით, პირდაპირმა უცხოურმა ინვესტიციებმა 2014 წელს საქართველოში შეადგინა 1 მილიარდ 272 მილიონი დოლარი, რაც 35 პროცენტით მეტია წინა, 2013 წლის მაჩვენებელზე”,- აღნიშნა სიტყვით გამოსვლისას ღარიბაშვილმა.
პრემიერმა აღნიშნა, რომ საქართველო თავისი გეოპოლიტიკური ადგილმდებარეობით სულ უფრო და უფრო მნიშვნელოვანი ხდება როგორც ენერგეტიკული და სატრანზიტო ჰაბი ცენტრალურ აზიასა და ევროპას შორის.
”მიგვაჩნია, რომ საქართველოს გეოგრაფიული მდებარეობა არ უნდა იქნეს გამოყენებული მხოლოდ ტრანზიტისთვის. საქართველოს აქვს რესურსი იყოს რეგიონალური ჰაბი. აქ შექმნილია სათანადო გარემო საერთაშორისო კომპანიების განთავსებისა და რეგიონალური საფინანსო ცენტრის ჩამოყალიბებისათვის”,- განმარტა მთავრობის მეთაურმა შეხვედრაზე გამოსვლისას.
