რუსეთის საგარეო საქმეთა მინისტრმა სერგეი ლავროვმა აშშ-ს სახელმწიფო მდივანს ჯონ ქერის, სოჭის შეხვედრაზე, საჩუქრად კრასნოდარში მოყვანილი კარტოფილი და პომიდორი მიართვა.
ამის შესახებ რუსეთის საგარეო საქმეთა სამინისტროს საინფორმაციო დეპარტამენტის წარმომადგენელი მარინა ზახაროვა სოციალურ ქსელ ,,ფეისბუქის” საკუთარ გვერდზე იუწყება.
,,ლავროვმა ქერის კრასნოდარის კარტოფილი და პომიდორი მიართვა, რომელთა წინაპარიც ამერიკელი კოლეგის მიერ მისთვის ადრე საჩუქრად ჩატანილი კარტოფილისა და პომიდვრის შორეული ნათესავია.” - წერს ზახაროვა.
მისი თქმით, ქერიმ ლავროვისგან საჩუქრად მიიღო მაისურიც, რომელზეც გამარჯვების სიმბოლოებია გამოსახული.
,,თავის მხრივ, აშშ-ს სახელმწიფო მდივანმა რუს კოლეგას რუსული საინფორმაციო გამოცემებიდან ამოკრეფილი ციტატების ის სია გადასცა, რომლებიც, მისი აზრით, რუსულ-ამერიკული ურთიერთობის მასშტაბების რეალურ პოტენციალს არ ასახავს.” - წერს ზახაროვა.
ჯონ ქერისა და სერგეი ლავროვის შეხვედრა ქალაქ სოჭში, სასტუმრო ,,როდინაში” მიმდინარეობს, სადაც რუსეთის საგარეო საქმეთა მინისტრი საბჭოთა წარმოების ავტომობილ ,,პობედით” მივიდა, რომლის საჭესთანაც თავად იჯდა.
შეხვედრაზე მხარეები რუსეთ-აშშ-ს შორის ურთიერთობას განიხილავენ. საუბარი შეეხება, ასევე, უკრაინაში, ირანში, იემენსა და სირიაში მიმდინარე მოვლენებს.
