,,ნაცმოძრაობის” წევრი სერგო რატიანი ,,ეროვნულ-დემოკრატიული ინსტიტუტის” (NDI) მიერ ჩატარებულ კვლევის შედეგებს ენდობა და აცხადებს, რომ საერთაშორისოდ აღიარებული ორგანიზაციის კვლევა არ შეიძლება ეჭვქვეშ დადგეს. როგორც ,,ჯი-ეიჩ-ენთან” საუბარში რატიანმა განაცხადა, კვლევამ აჩვენა, რომ ,,ნაცმოძრაობაა” ხელისუფლების მთავარი ალტერნატიული ოპოზიციური ძალაა.
,,NDI არის საერთაშორისოდ აღიარებული ორგანიზაცია და მისი კვლევის შედეგები იმსახურებს ნდობას. ამიტომ, სრულიად აბსურდულია, როცა ამ დონის რეპუტაციის მქონე კვლევებს არ ენდობიან. ის, რომ ,,ნაციონალური მოძრაობა” ხელისუფლების მთავარი ალტერნატივაა ამას აღიარებენ თავად ხელისუფლების მომხრეები. გამოკითხვაშიც კი ის ადამიანები რომელებიც შეიძლება ჩვენი მხარდამჭერები არ იყვნენ აცხადებენ, რომ ,,ნაციონალური მოძრაობა” მთავარი ალტერნატივა”, _განაცხადა სერგო რატიანმა.
ეროვნულ-დემოკრატიული ინსტიტუტის (NDI) მიერ ჩატარებული კვლევის თანახმად, გამოკითხულთა უმრავლესობა 44%, ქვეყანაში ყველაზე ძლიერ ოპოზიციურ პარტიად ,,ნაციონალებს” მიიჩნევს, მეორე პოზიციას ,,თავისუფალი დემეოკრატები” 6%-ით იკავებენ , მესამე ადგილზე კი ,,საქართველოს პატრიოტთა ალიასნია” - 5%-ით.
ამასთან გამოკითხულთა 84% მიიჩნევს, რომ ქვეყანაში ძლიერი ოპოზიციური პარტიის არსებობა მნიშვნელოვანია, ხოლო 4%-ის აზრით უმნიშვნელო.
გამოკითხვა 2015 წლის 27 მარტიდან–19 აპრილამდე პერიოდში, საქართველოს მასშტაბით 4,360 პირისპირ ინტერვიუს წარმომადგენლობითი შერჩევის საფუძველზე, ქვეყნის მოსახლეობას შორის ჩატარდა.
კვლევაში საშუალო ცდომილების ზღვარი არის +/- 2,3%.
NDI-ის კვლევებს აფინანსებს შვედეთის საერთაშორისო თანამშრომლობის განვითარების სააგენტო (Sida) და ატარებს კავკასიის კვლევითი რესურსების ცენტრი (CRRC).
