საქართველოს იუსტიციის მინისტრი თეა წულუკიანი ოფიციალური ვიზიტით, ესტონეთში იმყოფება. იუსტიციის სამინისტროს ინფორმაციით, წულუკიანი ინფორმაციული და საკომუნიკაციო ტექნოლოგიების კვირეულში მონაწილეობს.
მინისტრი აღნიშნული კვირეულის ფარგლებში 11-14 მაისს სხვადასხვა ღონისძიებაში მიიღებს მონაწილეობას. ვიზიტის ფარგლებში თეა წულუკიანი ესტონეთის იუსტიციის მინისტრ ურმას რეინსალუს შეხვდება. მინისტრები ორი ქვეყნის იუსტიციის სამინისტროებს შორის გამოცდილების გაზიარებაზე, რეფორმებსა და ვიზალიბერალიზაციის მიმდინარე პროცესებზე ისაუბრებენ.
სამინისტროს მიერ გავრცელებული ინფორმაციით, თეა წულუკიანი კონფერენციაზე სიტყვით გამოვა და საქართველოში ელექტრონული მმართველობის მიღწევებსა და იუსტიციის სამინისტროში გატარებულ რეფორმებზე ისაუბრებს. განიხილება ელექტრონული მმართველობის მნიშვნელობა სახელმწიფო ადმინისტრირებისა და აღმოსავლეთის პარტნიორობის პროცესის განვითარებაში.
ღონისძიებების პარალელურად შედგება შეხვედრები სხვადასხვა ქვეყნის წარმომადგენლებთან და განხილული იქნება ქვეყნებს შორის თანამშრომლობის გაღრმავების საკითხები ელექტრონული მმართველობის განვითარების თვალსაზრისით. ასევე, მოეწყობა შეხვედრები მსოფლიოს წამყვან ექსპერტებთან ელექტრონული მმართველობის მიმართულებით, სადაც განიხილება საკითხი საქართველოში ელექტრონული მმართველობის განვითარებაში საერთაშორისო გამოცდილების უფრო აქტიური ჩართვის მიმართულებით.
იუსტიციის სამინისტროს საზოგადოებასთან ურთიერთობის სამსახურის ინფორმაციით, აღნიშნული ღონისძიებები ორგანიზებულია ესტონეთის აღმოსავლეთის პარტნიორობის ცენტრის მიერ ესტონეთის ელექტრონული მმართველობის აკადემიასა და ევროკომისიასთან პარტნიორობით.
