კოალიცია ,,ქართული ოცნების” წევრი ლუკა კურტანიძე მთავრობის განახლებული შემადგენლობის სამთავრობო პროგრამას პოზიტიურად აფასებს. თუმცა, ,,ჯი-ეიჩ-ენთან” საუბარში დეპუტატი აცხადებს, რომ ქვეყანა ბევრი გამოწვევის წინაშე დგას.
,,პროგრამა, რომელიც პრემიერ-მინისტრმა წარადგინა ვის არ უნდა მოეწონოს. პროგრამა ყოველთვის კარგია, მონდომება და სურვილი საქმის კეთების ნამდვილად არის. ,,ქართული ოცნება” რასაც ერიდებოდა არის ის, რომ არ დამსგავსებოდა იმ რეჟიმს, რომელიც ცხრა წლის განმავლობაში გვქონდა, ერთი და იგივე ობიექტს ასჯერ ხსნიდნენ. თუმცა, ვფიქრობ, საზოგადოების ინფორმირებულობა გარკვეული დოზით იმ პროექტების შესახებ, რომელიც ხორციელდება აუცილებელია. ხელისუფლებას შენიშვნები რომ არ მისცენ ,,ნაციონალებმა” და ჩასაფრებულმა პოლიტიკოსებმა, ჩვენც ვაკეთებთ ამ შენიშვნებს და გვაქვს ბევრი შენიშვნა”, _განაცხადა კურტანიძემ.
კითხვაზე - კონკრეტულად რა შენიშვა აქვს უმრავლესობას, კურტანიძე აცხადებს:
,,მინდა, რომ მთავრობის ეკონომიკური გუნდი უფრო წარმატებული იყოს, რათა ჩვენი ეკონომიკური მდგომარეობა უფრო სტაბილური იყოს. Aარანორმალური უნდა იყო, რომ თქვა, ამ საკითხზე არ გვაქვს კოალიციის შიგნით საუბარი, მოსაზრება. არ ვარიდებთ პასუხისმგებლობას თავს. სწორედ ეს არის 1-ელი ოქტომბრის არჩევნების მონაპოვარი, რომ კოალიციის შიგნით ძალიან მოურიდებლად, იქნება ეს ეკონომიკური გუნდი, თუ სხვა სამინისტროები შენიშვნები გვაქვს და ვმუშაობთ. თუმცა, ვხედავთ მონდომებას, რომ გამოსწორდეს პრობლემები”, _ განაცხადა კურტანიძემ ,,ჯი-ეიჩ-ენთან” საუბარში.
"ძლიერი, დემოკრატიული, ერთიანი საქართველოსთვის",- პროგრამით მინისტრთა კაბინეტი საკომიტეტო მოსმენებსა თუ ფრაქციების სხდომებზე წარსდგა. ნდობის ხელახლა გამოცხადებამდე, მათ დეპუტატებს სამოქმედო გეგმა და მიმდინარე პროექტები გააცნეს. განახლებულ მთავრობას პარლამენტმა, დღევანდელ რიგგარეშე სხდომაზე, ნდობა უნდა გამოუცხადოს.
