გაზეთ "ქრონიკა +"-ის რედაქტორის, ელისო კილაძის დაკითხვა, "ქართული ოცნების" ყოფილი აღმასრულებელი მდივნის ზვიად ჯანყარაშვილის განცხადების საუძველზე მიმდინარეობს. ამის შესახებ განმარტებას პროკურორი დათო ნეფარიძე აკეთებს.
მისი ინფორმაციით, 2015 წლის 24 აპრილს ზვიად ჯანყარაშვილმა განცხადებით მიმართა საქართველოს მთავარ პროკურატურას. ჯანყარაშვილმა განცხადებაში მიუთითა, რომ გაზეთ "ქრონიკა+"-ის მთავარი რედაქტორის ელისო კილაძის და სხვა პირთა მიერ მასობრივი ინფორმაციის საშუალებებით გავრცელდა ცნობები, რომლებიც შეიცავდა ცალკეული თანამდებობის პირების მიერ სამსახურებრივი უფლებამოსილების გადამეტებისა და სამსახურებრივი მდგომარეობის გამოყენებით სახელმწიფოს კუთვნილი დიდი ოდენობით თანხის გაფლანგვის ნიშნებს.
,,2015 წლის 27 აპრილს ქ.თბილისის პროკურატურის საგამოძიებო ნაწილში დაიწყო გამოძიება სისხლის სამართლის საქმეზე სამსახურებრივი უფლებამოსილების გადამეტებისა და სამსახურებრივი მდგომარეობის გამოყენებით სახელმწიფოს კუთვნილი დიდი ოდენობით თანხის გაფლანგვის ფაქტებზე, საქართველოს სისხლის სამართლის კოდექსის 333-ე მუხლის პირველი ნაწილით, 182-ე მუხლის მე-2 ნაწილის "დ" და მე-3 ნაწილის "ბ" ქვეპუნქტებით გათვალისწინებული დანაშაულის ნიშნებით. მოცემულ საქმესთან დაკავშირებით დაიკითხა ზვიად ჯანყარაშვილი, ამჟამად მიმდინარეობს გაზეთ "ქრონიკა +"-ის რედაქტორის - ელისო კილაძის დაკითხვა", - აღნიშნა პროკურორმა და დასძინა, რომ დაკითხული იქნებიან სხვა პირებიც. ასევე, ჩატარდება სხვა საგამოძიებო და ოპერატიული მოქმედებები აღნიშნულ საქმესთან დაკავშირებით.
შეგახსენებთ, ელისო კილაძე პროკურატურაში მოწმის სტატუსით დაკითხვაზე იმყოფება.
