,გენერალთა კლუბის” ხელმძღვანელი, თბილისის საკრებულოს დეპუტატი კობა კობალაძე თავდაცვის მინისტრის თინა ხიდაშელის ინიციატივას მიესალმება. როგორც ,,ჯი-ეიჩ-ენთან” საუბარში კობალაძე აცხადებს გასათვალისწინებელია თავდაცვის ყოფილი მინისტრების, გამოცდილება, ხედვა და აზრი.
,,უდავოდ თინა ხიდაშელის აზრი მისასალმებელია, რადგან ყველა თავდაცვის მინისტრის მოღვაწეობის პერიოდში მათი უმთავრესი პასუხისმგებლობა ქვეყნის თავდაცვისუნარიანობის გაძლიერება იყო. ხიდაშელმა ბრძანა, რომ იმ პირებს მოიწვევს ვინც არიან საქართველოში, საკუთარი უფლებამოსილების შესრულების დროს არ იდეზერტირეს და პროკურატურას მათთან შეკითხვები არ აქვს. ყოფილი თავდაცვის მინისტრების აზრი, ხედვა, გამოცდილება გასათვალისწინებელია. ვფიქრობ, ეს არის საკმაოდ ჯანმრთელი, პრინციპული და კარგი ინიციატივა. Mმსგავსი ტიპის ინიციატივებს ქვეყანა მოკლებული იყო, რადგან ყველა ფიქრობდა რომ შეუცვლელი იყო და სხვისი გამოცდილება გასათვალისწინებელი არ იყო”, _განაცხადა კობალაძემ.
გენერალი მიიჩნევს, რომ თინა ხიდაშელს აქვს ყველა რესურსი დაკისრებული მოვალეობის წარმატებულად შესასრულებლად.
,,თინა ხიდაშელმა ბრძანა, რომ ის თავდაცვის უწყებაში მაგიდაზე ხელების დასაკაკუნებლად არ მიდის, არამედ მიდის იმიტომ, რომ ემსახუროს ქართველ ჯარისკაცებს, ოფიცრებს, რაც მისასალმებელია. თავადცვის სამინიტრო არის სისტემური სახელმწიფოებრივი ორგანო, რომელის სტრატეგია არ გამომდინარეობს იქიდან თუ ვინ დაინიშნება თავდაცვის მინისტრად, თავდაცვის სამინიტროს სტრატეგია აწყობილია ქვეყნის თავდაცვისუნარიანობის გამტკიცებაზე. Qქალბატონი თინას, პრინციპულობიდან, გადაწყვეტილების მიღების უნარიდან გამომდინარე, აქვს ყოველგვარი წინაპირობა დაკისრებულ მოვალეობას თავი წარმატებულად გაართვას”, - აღნიშნა კობალაძემ.
მისივე განცხადებით, ,,გენერალთა კლუბი” თავდაცვის სამინისტროსთან და უშუალოდ მინისტრთან აქტიურ თანამშრომლობას გეგმავს.
,,გენერალთა კლუბი, როგორც არასამთავრობო ორგანიზაცია, რომლის შემადგენლობაში არის ინტელექტუალური, გონებრივი, პროფესიული გამოცდილების მარაგი, ყოველთვის ორიენტირებულია ქვეყნის სიძლიერისა და თავდაცვისუნარიანობის განვითარებაზე იმუშაოს, ითანამშრომლოს და იყოს ჯარისკაცის რანგში', _აცხადებს კობა კობალაძე.
შეგახსენებთ, თავდაცვის ახალმა მინისტრმა უწყების ყოფილ ხელმზღვანელებს თანამშრომლობისკენ მოუწოდა.
,,ერთ-ერთი პირველი, რასაც ვგეგმავ, არის ის, რომ მე მინდა, თავდაცვის ყველა ყოფილ მინისტრს, ვინც საქართველოში იმყოფება და პროკურატურის აღრიცხვაზე არ არის აყვანილი, ვთხოვო, რომ მობრძანდნენ თავდაცვის სამინისტროში და ჩვენ ერთგვარი კლუბივით შევქმნათ, სადაც ქვეყნის წინაშე მდგარ გამოწვევებზე პერიოდულად ერთად ვისაუბრებთ ხოლმე. იმიტომ, რომ ერთ რამეში ვარ ღრმად დარწმუნებული, რომ იმის მიუხედავად, როდის რა ხელისუფლება იყო, საქართველოში თითქმის ყოველთვის თავდაცვის ყველა მინისტრის მთავარი ამოცანა და ოცნება იყო საქართველო ნატოში,"- განაცხადა ხიდაშელმა ტელეკომპანია "იმედის" ეთერში.
