"მიუხედავად იმ წინააღმდეგობისა, რომელსაც საქართველოს ხელისუფლება მიქმნიდა, რათა აზერბაიჯანში ჩემი ვიზიტი არ შემდგარიყო, მე მაინც ბაქოში, ჩემს მეგობრებთან ვარ." ამის შესახებ საქართველოს ექსპრეზიდენტმა აზერბაიჯანულ გამოცემა "ჰაქინისთვის" მიცემულ ინტერვიუში განაცხადა. მიხეილ სააკაშვილის თქმით, ყოველგვარი საუბარი იმის შესახებ, რომ მას ინტერპოლი ეძებს, სხვა არაფერია, თუ არა პროფანაცია. ყოფილმა პრეზიდენტმა კომენტარი საქართველო აზერბაიჯანის ურთიერთობებზეც გააკეთა. "საქართველომ უკვე გაიფუჭა ურთიერთობა ბევრ ქვეყანასთან. ქვეყანა ეკონომიკურმა კრიზისმა მოიცვა. ივანიშვილის რეჟიმის პირობებში საქართველო სხვა სახელმწიფოებისთვის სუსტი პარტნიორი გახდა. ამჟამინდელ ხელისუფლებას არ შეუძლია ვინმესთან მეგობრობა. მათ მხოლოდ საკუთარი მოგება აინტერესებთ,"-აღნიშნა სააკაშვილმა, რომელიც ბაქოში ექსპრეზიდენტებისა და მთავრობის მეთაურთა სამიტზე დასასწრებად უკრაინიდან ჩავიდა.
