როდესაც ნორმალური ხალხი დაბრუნდება მთავრობაში, სიტუაცია შემობრუნდება. ამის შესახებ ყოფილმა პრემიერ-მინისტრმა ვანო მერაბიშვილმა დღეს, სასამართლო პროცესზე განაცხადა.
,,მინდა ქართულ საზოგადოებას ვუთხრა, რომ სიტუაცია არ არის პესიმისტური. როდესაც ნორმალური ხალხი დაბრუნდება მთავრობაში, სიტუაცია შემობრუნდება. ეს უკრაინამაც დაამტკიცა, როდესაც რამდენიმე პირმა სიტუაცია უკრაინაში გამოასწორა. როდესაც ეს ხალხი დაბრუნდება, ვინც ამ ხროვის ნათესავი არ არის, სიტუაცია საქართველოში უკეთესობისკენ წავა", - განაცხადა მერაბიშვილმა.
მოსამართლემ, პატიმრობაში მყოფ ყოფილ პრემიერს სიტყვა გააწყვეტინა, რასაც სიტყვიერი დაპირისპირება მოჰყვა. მოსამართლემ განმარტა, რომ მერაბიშვილის განცხადება პოლიტიკური ხასიათის იყო.
შეგახსენებთ, რომ სასამართლოში პროცესი 7 ნოემბრის საქმეზე მიმდინარეობდა.
ამ საქმეში ბრალდებულები არიან ყოფილი მაღალჩინოსნები - გიგი უგულავა, ვანო მერაბიშვილი, მიხეილ სააკაშვილი, დავით კეზერაშვილი და ზურაბ ადეიშვილი.
