კოალიცია ,,ქართული ოცნების” წევრი ლევან ბერძენიშვილის აცხადებს, რომ ქვეყანაში არსებული მდგომარეობიდან გამომდინარე მინისტრების შეცვლის უფრო მაღალი ტემპია მოსალოდნელი. თუმცა, დეპუტატი ,,ჯი-ეიჩ-ენთან” საუბარში დასძენს ასევე, რომ ღარიბაშვილის მთავრობა ჯერჯერობით ნდობით სარგებლობს და ხელახლა ამის შემოწმება საჭირო არაა.
დეპუტატი არ ფლობს ინფორმაციას იქნება თუ არა სპორტის მინისტრი ლევან ყიფიანი მომდევნო მინისტრი ვინც თანამდებობას დატოვებს.
,,ვერ გეტყვით, ამ საქმეში ჩახედული არ ვარ, მაგრამ კიდევ ერთი მინისტრის გადაყენება მთავრობისთვის ხელახალი ნდობის გამოცხადების საკითხის დასმას იწვევს და არა მგონია ამაზე ძალიან უნდა ავჩქარდეთ. მთავრობა, ჯერჯერობით, სარგებლობს ნდობით და ხელახლა ამის შემოწმება საჭირო არ უნდა იყოს, -აღნიშნა ბერძენიშვილმა.
რაც შეეხება მინისტრთა კაბინეტში ცვლილებებს, იგი ამაში უჩვეულოს ვერაფერს ხედავს.
,,მინდა გითხრათ, რომ დიდი ხანია ბატონ ხოკრიშვილს თავის ოჯახთან ერთად უცხოეთში უნდოდა და მისი თანამდებობიდან წასვლა სხვას არაფერს არ უკავშირდება. რაც შეეხება მიმდინარე პროცესებს, მინისტრების შეცვლა მთავრობაში ჩვეულებრივი პროცესია. მე მგონი, გაცილებით უფრო ნელი ტემპით იცვლებიან მინისტრები, ვიდე ბოლო ცხრა წლის განმავლობაში ვიყავით შეჩვეული.. ვფიქრობ, ქვეყანაში არსებული მდგომარეობიდან გამომდინარე უფრო მაღალი ტემპია მინისტრების შეცვლის მოსალოდნელი, მაგრამ ამ კონკრეტულ შემთხვევაში ნამდვილად ვიცი, რომ ოჯახურ საკითხს უკავშირდება”, -აცხადებს ,,ჯი-ეიჩ-ენთან” საუბარში ლევან ბერძენიშვილი.
