,,ნაცმოძრაობის” დეპუტატი გივი თარგამაძე სოციალურ ქსელში მინისტრთა კაბინეტში განხორციელებულ ცვლილებებს ეხმიანება და აცხადებს, რომ მომდევნო მინისტრი ვინც თანამდებობას დატოვებს სოფლის მეურნეობის მინისტრი ოთარ დანელია იქნება.
რაც შეეხება გარემოს დაცვის მინისტრის ელგუჯა ხოკრიშვილის გადაწყვეტილებას, თარგამაძის შეფასებით ის ღარიბაშვილ-თამაზაშვილ-ჯანყარაშვილის კლანის კორუფციული სქემის კიდევ ერთი რგოლია.
,,ელგუჯა ხოკრიშვილი ღარიბაშვილ-თამაზაშვილ-ჯანყარაშვილის კლანის კორუფციული სქემის კიდევ ერთი რგოლია. სქემისა, რომელიც ჩვენ გამოვააშკარავეთ და ვაიძულეთ ივანიშვილი, ეს კლანი ხელისუფლებას ჩამოაშოროს. ხოკრიშვილი ინფრასტრუქტურის მინისტრიც იყო, გარემოს დაცვის სამინისტროში კი ის ბუღალტერიც გაიყოლა, რომელიც ინფრასტრუქტურის სამინისტროდან დიდი თანხის კერძო ანგარიშებზე გადარიცხვის გამოა დაკავებული და წყლის კომპანიის ხელმძღვანელი, ჯანყარაშვილის უახლოესი ძმაკაცი ცაბუტაშვილიც. სწორად წყლის კომპანია აერთიანებს ამ კორუფციულ სქემაში მთავრობაში დარჩენილ ღარიბაშვილის უკანასკნელ კადრს, სოფლის მეურნეობის მინისტრ დანელიასაც, რომელიც ღარიბაშვილთან ჯერ კიდევ შსს-ში მუშაობდა. იდეა ის იყო, რომ წყლის ყველა კომპანიის - თბილისის წყლის, საქართველოს წყლის და მელიორაციის გაერთიანება მომხდარიყო. როდესაც მიხვდნენ, რომ თბილისის წყალს მის მფობელს ვერანაირი ზეწოლით ვერ "აახევდნენ", მთლიანი სფეროს გაკონტროლებისთვის ძალები გაანაწილეს: საქართველოს წყალში ცაბუტაშვილის კაცი დატოვეს, თავად კი გარემოს დაცვის სამინისტროში ხოკრიშვილთან ერთად გადაიყვანეს წყლის რესურსებზე ლიცენზიების კონტროლისთვის; სოფლის მეურნეობის სამინისტროში დანელია გადაიყვანეს მელიორაციის სისტემის საკონტროლებლად; შექმნეს წყლის რესურსების სახელმწიფო კომისია, რომლის ხელმძღვანელიც თავად ღარიბაშვილი გახდა. თუნდაც მხოლოდ მელიორაციის "მიღწევებისადმი" მიძღვნილი გრძელი კლიპის თითო სატელევიზიო სარეკლამო ბლოკში გასვლის სიხშირეს თუ დავაკვირდებით, მივხვდებით, რა თანხები იხსნება ამ სფეროში. ამდენად, ბუნებრივი იქნება, რომ წყლის კომისიის თავმჯდომარის, წყაროს თავზე მჯდომი, პრემიერ-მინისტრ ღარიბაშვილის მთავრობის მოღვაწეობას ამ სქემის ბოლო მინისტრის, დანელიას წასვლა დაასრულებს, რომელსაც, ალბათ, გაახსენდება, რომ სახლში უთო დარჩა ჩართული და სამინისტროს მოადგილეს, უჩა მამაცაშვილის დის ქმარს დაუტოვებს. და შესრულდება ჩვენი პირობა - უნიათოთა მთავრობა შეწყვეტს არსებობას”, -აღნიშნავს გივი თარგამაძე.
