იუსტიციის მინისტრი თეა წულუკიანი მთავრობისთვის ხელახალი ნდობის გამოცხადების საკითხთან დაკავშირებით საგანგაშოს ვერაფერს ხედავს. რაც შეეხება ხოკრიშვილის გადაწყვეტილებას, წულუკიანის განმარტებით, გარემოს დაცვის მინისტრის თანამდებობიდან წასვლით მთავრობას პატიოსანი და მშრომელი ადამიანი გამოაკლდა.
"თუ მთავრობისთვის ნდობის გამოცხადების საკითხი დადგა, არ მგონია, სანერვიულო იყოს, რომ ახალი მთავრობა ვერ დაკომპლექტდება ისეთი პროფესიონალი კადრებით, რომელსაც პარლამენტი ნდობას ვერ გამოუცხადებდა", - განაცხადა წულუკიანმა.
გარემოს დაცვის მინისტრი ელგუჯა ხოკრიშვილი მეექვსე მინისტრია ვინც პრემიერ ირაკლი ღარიბაშვილის გუნდიდან თანამდებობა დატოვა. შესაბამისად, კიდევ ერთი მინისტრის შეცვლის შემთხვევაში, მთავრობის ხელახალი ნდობის გამოცხადების საკითხი დღის წესრიგში დგება. როგორც ,,ჯი-ეიჩ-ენთან” საუბარში კონსტიტუციონალისტი ვახუშტი მენაბდე აცხადებს, შვიდი მინისტრის შეცვლის შემდეგ, პრეზიდენტი ვალდებულია, პარლამენტს მთავრობის ახალი შემადგენლობა დასამტკიცებლად 7 დღის ვადაში წარუდგინოს.
მენაბდის განმარტებით, იმ შემთხვევაში, თუ პარლამენტი სამჯერ უარს იტყვის მთავრობის ახალი შემადგენლობის დამტკიცებაზე, დღის წესრიგში რიგგარეშე არჩევნების საკითხი დგება.