პროკურატურა იმ ფაქტების გამოკვლევას იწყებს, რომელიც იური ვაზაგაშვილის მკვლელობაში ბრალდებულმა გია სოსანაშვილმა და მისმა ადვოკატმა სოსო ჯოგლიძემ საჯაროდ გაახმაურეს. მთავარმა საგამოძიებო ორგანომ სპეციალური განცხადება უკვე გაავრცელა. ბადაშვილის უწყებაში განმარტავენ, რომ საუბარია დნმ-ის ანალიზზე, რომელიც სოსანაშვილის განცხადებით, მას დაკავებამდე აუღეს. პროკურატურის განცხადებაში ნათქვამია, რომ "გამოძიების მიერ მოწმის სახით დაიკითხა შინაგან საქმეთა სამინისტროს გენერალური ინსპექციის თანამშრომელი როინ ასანიძე, რომელმაც კატეგორიულად უარყო სოსანაშვილისგან დნმ-ის ნიმუშის აღების ფაქტი და მიუხედავად დაცვის მხარის შუამდგომლობის აბსურდულობისა, აღნიშნული თემის ირგვლივ წამოჭრილ ყველა კითხვაზე პასუხის გაცემის მიზნით, თავად გამოთქვა სურვილი ბრალდებულის ადვოკატისა და დაზარალებული მხარის თანდასწრებით მისგან დნმ-ის ნიმუშის აღებასა და შესაბამისი ექსპერტიზის ჩატარებაზე." პროკურატურის ინფორმაციით, როინ ასანიძისგან აღებული დნმ-ის ნიმუშები ექსპერტიზის ბიუროს უკვე გადააეგზავნა.
