კანონმდებლებმა ბიუროს დღვანდელ სხდომაზე 29 აპრილისთვის განსახილველ საკითხებზე იმსჯელეს. სესიაზე პირველი მოსმენით, დაჩქარებული წესით განიხილავენ „უკანონო შემოსავლის ლეგალიზაციის აღკვეთის ხელშეწყობის შესახებ“ საქართველოს კანონში ცვლილების შეტანის თაობაზე“ მთავრობის ინიციატივით წარმოდგენილ კანონპროექტთა პაკეტს.
კანონპროექტით, გარიგების (ოპერაციის) შეჩერების თაობაზე ფინანსური მონიტორინგის სამსახურის მითითებათა გაცემის და შესრულების წესი განისაზღვრება. მონიტორინგის სამსახურის უფროსი უფლებამოსილი იქნება საეჭვო გარიგების შესახებ ვარაუდის არსებობისას წერილობითი მითითება მისცეს მონიტორინგის განმახორციელებელ პირს შესაბამისი გარიგების, აგრეთვე ამ გარიგების მონაწილე პირებთან დაკავშირებული ნებისმიერი გარიგების (ოპერაციის) შეჩერების ან/და პროფესიული მომსახურების შეზღუდვის თაობაზე. თავის მხრივ, მონიტორინგის განმახორციელებელ პირებს არ ექნებათ უფლება გარიგების მონაწილე პირებს (ასევე სხვა პირებს) შეატყობინონ, რომ მათ მიმართ ხორციელდება აღნიშნული ზომები (მითითების საფუძველზე გარიგების (ოპერაციის) შეჩერება). ასევე დგინდება მონიტორინგის განმახორციელებელი პირების ვალდებულება, მათ მიერ შემუშავებულ შიდა ინსტრუქციებში გაიწეროს მონიტორინგის სამსახურის მითითების შესრულების წესი და პროცედურები.
