თბილისის საქალაქო სასამართლოში ე.წ. კაბელების საქმეზე წინა სასამართლო სხდომა 6 მაისს 11:00 საათზე განახლდება.
დღევანდელ სხდომაზე კი ადვოკატებმა და პროკურორებმა ერთმანეთის მტკიცებულებების დაუშვებლად ცნობა მოითხოვეს და პასუხს მომდევნო პროცესზე მოისმენენ.
დაცვის მხარის ადვოკატის ლევან სამუშიას განმარტებით, ერთ-ერთი მტკიცებულება, რომლის დაუშვებლად ცნობასაც დაცვის მხარე ითხოვს, ექსპერტიზის დასკვნაა.
,,ექსპერტიზის დასკვნა ეყრდნობა წერილს, რომელიც ბუნებაში არ არსებობს და ბრალდების მხარეს საერთოდ არ წარმოუდგენია სასამართლოზე. აღნიშნული წერილი არ არის თავად ექსპერტიზის დასკვნაშიც. მითიური წერილის საფუძველზეა აგებული ექსპერტიზის დასკვნა, რაც მიგვაჩნია, რომ დაუშვებელი მტკიცებულებაა", - განაცხადა ლევან სამუშიამ.
საქმის პროკურორის, ნინო აღლუმაშვილის განცხადებით, კი დაცვის მხარე სასამართლოზე არასწორად აპელირებდა კანონის დარღვევებზე.
,,დაცვის მხარემ ორი შუამდგომლობა დააყენა. ერთით ითხოვდა მტკიცებულებების დაშვებას, მეორეთ კი იგივე მტკიცებულების დაუშვებლად ცნობას. მტკიცებულებები, ან დასაშვებია ,ან დაუშვებელი და ვფიქრობთ, რომ ეს გაურკვეველი და ბუნდოვანი მოთხოვნა იყო გახმოვანებული სასამართლო სხდომაზე", - განაცხადა პროკურორმა.
შეგახსენებთ, საქალაქო სასამართლოს გადაწყვეტილებით, თავდაცვის სამინისტროს 5 თანამშრომელს აღკვეთის ღონისძიებად, 2 თვიანი წინასწარი პატიმრობა შეეფარდა. დაკავებულებს, გამოძიება სახელმწიფო ბიუჯეტის კუთვნილი 4 102 872 ლარის გაფლანგვის ედავება.
გამოძიების ინფორმაციით, 2013 წელს, თავდაცვის სამინისტროს მიერ ორგანიზებული საიდუმლო სახელმწიფო შესყიდვის მიმდინარეობისას, უპირატესობის „სილქნეტის" მიენიჭა. პროკურატურის განცხადებით, ხელშეკრულებით თავდაცვის სამინისტრომ სს „სილქნეტს" უნდა გადაუხადოს ჯამში 6 720 877.42 ლარი, საიდანაც წინასწარ (ავანსად) გადარიცხულია უკვე 6 480 877.42 ლარი, სანაცვლოდ კი თავდაცვის სამინისტრომ სს „სილქნეტისგან" 2015 წლის 16 იანვარს უნდა მიიღოს ქონება და მომსახურება, რომლის რეალური საბაზრო ღირებულება ექსპერტიზის დასკვნის შესაბამისად შეადგენს მხოლოდ 2 618 004.82 ლარს.
