27-30 აპრილს, ნორვეგიის სამეფოში, ნატო-ს საპარლამენტო ასამბლეის ტრანსატლანტიკური თავდაცვის და უსაფრთხოების თანამშრომლობის ქვეკომიტეტის გასვლითი შეხვედრა გაიმართება. შეხვედრაში საქართველოს საპარლამენტო დელეგაციის ხელმძღვანელი ირაკლი სესიაშვილი მიიღებს მონაწილეობას.
პარლამენტის ინფორმაციით, პროგრამის ფარგლებში ნატოს საპარლამენტო ასამბლეის წევრები ნორვეგიის სამეფოს მთავრობის და შეიარაღებული ძალების წარმომადგენლებთან გამართავენ შეხვედრებს.
აღნიშნულ შეხვედრებზე განიხილება ჩრდილოატლანტიკური ალიანსისა და გლობალური უსაფრთხოების ისეთი საკითხები, როგორებიცაა: ნატო-ს ჩრდილოეთ ფლანგზე წარმოქმნილი უსაფრთხოების გამოწვევები, კლიმატური ცვლილებების ნეგატიური ეფექტი, ნორვეგიის სამეფოს როლი მე-5 თაობის ავიაგამანადგურებლის (F-35-ის) შექმნის პროგრამაში, ნატო და არქტიკა დღეს და ხვალ, სკანდინავიური ქვეყნების (NORDIC) თავდაცვითი თანამშრომლობა და რუსეთი.
