აშკარად ყველას აქვს განცდა, რომ მეტია გასაკეთებელი იმისთვის, რომ საზოგადოების უსაფრთხოება და წესრიგი იყოს უზრუნველყოფილი, -ამის შესახებ, თავდაცვის ყოფილმა მინისტრმა ირაკლი ალასანიამ შინაგანა საქმეთა სამინისტროს მიერ გამოქვეყნებული სტატისტიკური მონაცემების შეფასებისას განაცხადა.
მისივე განმარტებით, საქართველოს დღევანდელი დემოკრატიის, კონსოლიდაციის "აქილევსის ქუსლი" არის პროკურატურა, რომელიც ყოფილი პრემიერის ბიძინა ივანიშვილის გავლენის ქვეშაა.
"მნიშვნელოვანია პროფესიონალი კადრები იყვნენ დანიშნული იმ თანამდებობაზე რომელიც საზოგადოების უსაფრთხოებაზე პასუხისმგებელია. საქართველოს დღევანდელი დემოკრატიის, კონსოლიდაციის "აქილევსის ქუსლი" არის პროკურატურა. პროკურატურა რომელიც პირდაპირ ემორჩილება დე-ფაქტო პრემიერ-მინისტრ ბიძინა ივანიშვილს”, -განაცხადა ალასანიამ ჟურნალისტებთან საუბრისას.
შეგახსენებთ, რომ შსს-მ 2015 წლის იანვარ-მარტის თვეებში დანაშაულის სტატისტიკა გამოქვეყნა. შსს-ს ინფორმაციით, წინა წლის ანალოგიურ პერიოდთან შედარებით დანაშაულმა 15. 24%-ით იკლო.
საგამოძიებო უწყებების მიერ 8970 დანაშაულია რეგისტრირებული, საიდანაც 4697 გაიხსნა. უწყების ინფორმაციით, დანაშაულის გახსნის პროცენტული მაჩვენებელი 52.36%-ია.