,,თავისუფალი დემოკრატების" საერთაშორისო მდივანი, მაია ფანჯიკიძე, იტალიაში იმყოფება, სადაც ნატოს თავდაცვის კოლეჯის მიწვევით, წაიკითხა ლექცია თემაზე, ,,ნატოს პარტნიორული ინიციატივები".
პარტიის ინფორმაციით, ნატოს პერსპექტივიდან ამ საკითხზე ისაუბრა ალბერტო ბინმა, რომელიც ნატოს სათაო ოფისის ინტეგრაციის, პარტნიორობისა და თანამშრომლობის დირექტორატის ხელმძღვანელია.
პარტნიორი ქვეყნის თვალსაზრისი პარტნიორობის და ინტეგრაციის საკითხზე კი მაია ფანჯიკიძემ წამოადგინა. ლექციას 28 ქვეყნის 76 წარმომადგენელი დაესწრო, როგორც ნატოს წევრი ქვეყნებიდან, ასევე, პარტნიორი ქვეყნებიდან. დამსწრეთა შორის იყო საქართველოს წარმომადგენელიც.
ლექციის დასრულების შემდეგ, მაია ფანჯიკიძე, ერთი საათის განმავლობაში პასუხობდა დამსწრეთა კითხვებს.
მოგვიანებით, ,,თავისუფალი დემოკრატების" საერთაშორისო მდივანმა, კოლეჯის სხვადასხვა კომიტეტებთან რამდენიმე ცალკეული სემინარი გამართა.
