ხვალ, 23 აპრილს, ქ. თბილისში, საგარეო საქმეთა სამინისტროში გაიმართება აშშ-საქართველოს სტრატეგიული პარტნიორობის ქარტიის ფარგლებში უსაფრთხოებისა და თავდაცვის სამუშაო ჯგუფის მორიგი შეხვედრა.
საგარეო უწყების ინფოირმაციით, ქართული მხრიდან შეხვედრას ხელმძღვანელობენ საგარეო საქმეთა მინისტრის პირველი მოადგილე დავით დონდუა და თავდაცვის მინისტრის მოადგილე ლევან ღირსიაშვილი, ხოლო შეერთებული შტატების მხრიდან კი აშშ-ის სახელმწიფო მდივნის თანაშემწის პირველი მოადგილე სამხედრო-პოლიტიკურ საკითხებში ტოდ ჩეპმენი და აშშ-ის თავდაცვის მდივნის თანაშემწის მოადგილე რუსეთის, უკრაინისა და ევრაზიის საკითხებში ეველინ ფარკასი.
შეხვედრაზე მხარეები განიხილავენ საქართველოსა და აშშ-ს შორის არსებულ და სამომავლო ორმხრივ თანამშრომლობას უსაფრთხოებისა და თავდაცვის მიმართულებებით, ასევე მიმოიხილავენ რეგიონული და მრავალმხრივი უსაფრთხოების საკითხებს. განსაკუთრებული ყურადღება დაეთმობა საქართველოს ოკუპირებულ რეგიონებში შექმნილ ვითარებას, არსებულ გამოწვევებს, აგრეთვე საქართველოს თავდაცვითი შესაძლებლობების განმტკიცებასა და ქვეყნის ნატოში ინტეგრაციის საკითხებს.
