პროკურატურა ადეიშვილისთვის ლტოლვილის სტატუსის მიმნიჭებელ ქვეყანას ადგენს და გასაჩივრებას გეგმავს, - ამის შესახებ მთავარი პროკურორის მოადგილემ ირაკლი შოთაძემ განაცხადა. მისი თქმით, ზურაბ ადეიშვილს ლტოლვილის სტატუსი 2013 წლის 8 თებერვალს აქვს მიღებული, თუმცა სტატუსის მიმნიჭებელი ქვეყანა პროკურატურისთვის უცნობია.
„აღნიშნული ქვეყნის დასადგენად პროკურატურამ შინაგან საქმეთა სამინისტროს ინტერპოლის ბიუროს მიმართა, რათა გადაწყვეტილება ლტოლვილის სტატუსის მიმნიჭებელ ქვეყანასთან გავასაჩივროთ“, - აღნიშნა მთავარი პროკურორის მოადგილემ.
ინტერპოლმა ძებნილთა სიიდან რამდენიმე დღის წინ იუსტიციის ყოფილი მინისტრი ზურაბ ადეიშვილი ამოიღო. მთავარი პროკურატურის ინფორმაციით, ინტერპოლმა ადეიშვილის მიმართ საერთაშორისო ძებნის გაუქმების ძირითად საფუძვლად ქართული მხარისთვის უცნობი ერთ-ერთი სახელმწიფოს მიერ ადეიშვილისთვის მინიჭებული ლტოლვილის სტატუსი მიუთითა.
