საქართველოს საგარეო საქმეთა სამინისტროსა და ჰონდურასის რესპუბლიკის საგარეო საქმეთა და საერთაშორისო თანამშრომლობის სამინისტროს შორის ორმხრივი პოლიტიკური კონსულტაციების პირველი რაუნდი გაიმართა. საქართველოს დელეგაციას მინისტრის პირველი მოადგილე, დავით დონდუა ხელმძღვანელობდა, რომელსაც ჰონდურასის საგარეო ურთიერთობებისა და საერთაშორისო თანამშრომლობის სახელწიფო მდივნის მოადგილემ, რობერტო ოჩოა მადრიდმა უმასპინძლა.
პოლიტიკური კონსულტაციების ფარგლებში, რომელიც საქართველოსა და ჰონდურასის საგარეო უწყებებს შორის 2013 წლის 23 სექტემბრის ურთიერთგაგების მემორანდუმის ფარგლებში გაიმართა, მხარეებმა მიმოიხილეს ორმხრივი და მრავალმხრივი ურთიერთობების ფართო სპექტრი. მათ შორის, პოლიტიკური, ჰუმანიტარული, ინვესტიციების, ვაჭრობის, კულტურის, განათლებისა და მეცნიერების სფეროებში თანამშრომლობის საკითხები.
შეხვედრაზე მხარეებმა დააფიქსირეს საქართველოსა და ჰონდურასს შორის არსებული კეთილმეგობრული ურთიერთობები და გამოხატეს სამომავლო თანამშრომლობის გააქტიურების მზაობა. ამ კონტექსტში, ხაზი გაესვა მრავალმხრივ ფორმატში ჰუმანიტარულ თემებზე თანამშრომლობის მნიშნელობასა და საერთო ინტერესების საკითხებზე ურთიეთმხარდაჭერის გააქტიურებას.
ხალხთა შორის ურთიერთობების ხელშეწყობისა და ორმხრივი სამართლებრივი ბაზის გაღრმავების მიზნით, მხარეებმა განიხილეს უვიზო მიმოსვლის შესახებ შეთანხმების პროექტები და შეთანხმდნენ დიპლომატიური არხების მეშვეობით საკითხის სამუშაო რეჟიმში განხილვაზე.
აღსანიშნავია, რომ ვიზიტის ფარგლებში ჰონდურასის მხარეს გადაეცა საქართველოს მთავრობის კონტრიბუცია ჰონდურასის პირველი ლედის მიერ ინიცირებული პროექტის - „დაავადებულთა მკურნალობის მენეჯმენტის გაძლიერება ამბულატორულ და საგანგებო ვითარებებში“ ხელშეწყობის მიზნით. ამას გარდა, საქართველოს მხარემ გამოხატა მზაობა ქვეყანაში წარმოებული რეფორმების თაობაზე გამოცდილების გაზიარების კუთხით, რამაც ჰონდურასის მხარის დაინტერესება გამოიწვია.
ვიზიტის ფაგრლებში ხელი მოეწერა თანამშრომლობის მემორანდუმს საქართველოს საგარეო საქმეთა სამინისტროს ლევან მიქელაძის სახელობის დიპლომატიურ სასწავლო ცენტრსა და ჰონდურასის საგარეო საქმეთა და საერთაშორისო თანამშრომლობის სამდივნოს „ხოსე სესილიო დელ ვაიეს“ დიპლომატიურ აკადემიას შორის, რომელიც სასწავლო დაწესებულებებს შორის აკადემიურ ურთიერთგაცვლას ითვლისიწინებს.
დასასრულს, მხარეები შეთანხმდნენ პოლიტიკური დიალოგის გაგრძელებასა და კონსულტაციების მორიგი რაუნდის გამართვაზე თბილისში.
