პერსონალურ მონაცემთა დაცვის მდგომარეობისა და პერსონალურ მონაცემთა დაცვის ინსპექტორის საქმიანობის შესახებ 2014 წლის ანგარიში მოისმინეს ადამიანის უფლებათა დაცვისა და სამოქალაქო ინტეგრაციის კომიტეტის სხდომაზე.
ინფორმაცია პრეზენტაციის ფორმატით პერსონალურ მონაცემთა დაცვის ინსპექტორის მოადგილემ, ნიკა ბრეგვაძემ წარმოადგინა. მისი განცხადებით, გასულ წელს განხორციელებულ საკანონმდებლო ცვლილებების შემდეგ უწყების საქმიანობა მნიშვნელოვნად შეიცვალა და მას მთელი რიგი ახალი ფუნქცია-მოვალეობები დაემატა.
„2014 წელი გადამწყვეტი იყო როგორც პერსონალურ მონაცემთა დაცვის სფეროში სახელმწიფო პოლიტიკის ჩამოყალიბებისა და მისი პრაქტიკაში დანერგვის მხრივ, აგრეთვე ინსპექტორის აპარატისთვისაც, ვინაიდან პარალელურ რეჟიმში ინტენსიურად მიმდინარეობდა მუშაობა კანონმდებლობის დახვეწაზე, ორგანიზაციის სტრუქტურულ და ფუნქციურ გაძლიერებაზე, მოქალაქეთა ცნობიერების გაზრდასა და მონაცემთა დამმუშავებლების პასუხისმგებლობის ამაღლებაზე“, - განაცხადა ნიკა ბრეგვაძემ.
რაც შეეხება უშუალოდ ანგარიშს, მასში დეტალურად იქნა ასახული 2014 წლის მნიშვნელოვანი მოვლენები, მონაცემთა დამუშავების პრინციპები და კანონიერი საფუძვლები, სამართალდამცავი სტრუქტურების მიერ პერსონალურ მონაცემთა დამუშავების საკითხები და ის სტატისტიკური მონაცემები, რაც უწყებამ გასულ წელს თავის საქმიანობის ფარგლებში განახორციელა.
კომიტეტის თავმჯდომარემ, ეკა ბესელიამ დადებითად შეაფასა პერსონალურ მონაცემთა დაცვის ინსპექტორის საქმიანობა და აღნიშნა, რომ ეს პირველი ანგარიშია, რომელსაც კომიტეტი სამსახურის ახალ ინსტიტუტად ჩამოყალიბების შემდეგ ისმენს.
,,კომიტეტისთვის საინტერესოა, თუ როგორ ხორციელდება ქვეყანაში პერსონალურ მონაცემთა დაცვა და დამატებით კიდევ რა საკანონმდებლო ცვლილებები შეიძლება განხორციელდეს აღნიშნული უწყების საქმიანობის გაუმჯობესების მიმართულებით. კომიტეტი განსაკუთრებულ ყურადღებას ადევნებს პერსონალურ მონაცემთა დაცვის ინსპექტორის საქმიანობას და დადებითად აფასებს მის მიერ წარმოდგენილ ანგარიშს“, - განაცხადა ეკა ბესელიამ.
სხდომაზე კომიტეტის მიერ საკანონმდებლო ინიციატივის წესით წარმოდგენილი ,,საქართველოს ადმინისტრაციულ საპროცესო კოდექსში ცვლილების შეტანის შესახებ“ კანონპროექტი განიხილეს. კოდექსში ცვლილებების შეტანის საკანონმდებლო წინადადებით კომიტეტს სახალხო დამცველმა ცოტა ხნის წინ მიმართა. კომიტეტმა მოიწონა შეთავაზებული ცვლილებები და შესაბამისად, მხარი დაუჭირა მის საკანონმდებლო ინიციატივად ჩამოყალიბებას. ცვლილებების მიზანს კი ადმინისტრაციული სამართალწარმოების პროცესში სასამართლოს მეგობრის ფუნქციის დამატება წარმოადგენს. აღნიშნული ფუნქციით, სახალხო დამცველი სისხლის სამართლის პროცესში უკვე სარგებლობს.
კომიტეტის წევრებმა კანონპროექტის პირველი მოსმენით პლენარულ სხდომაზე გატანას მხარი ერთხმად დაუჭირეს.
