,,ნაცმოძრაობის” წევრი გიორგი ვაშაძე უზენაესი სასამრთლოს თავმჯდომარის პოსტზე ნინო გვენეტაძის დანიშვნას ნეგატიურად აფასებს და აცხადებს, რომ სასამართლოს სრულიად განსხვავებული ადამიანი სჭირდება.
,,იარეს, იარეს და შევარდნაძისდროინდელ მოსამართლეს ჩააბარეს სასამართლო სისტემა. ვფიქრობ, სრულიად განსხვავებული ადამიანი სჭირდება სასამართლო ხელისუფლებას რომელიც მაინც და მაინც მისი წიაღიდან არ იქნება, იქნება გარედან და იქნება მართლაც მაღალი რანგის პროფესიონალი, რომლის მიმართ ყველას ექნება ნდობა არა მხოლოდ ,,ქართულ ოცნებას”, არამედ საზოგადოების უმრავლესობას ," - განაცხადა ვაშაძემ ,,პრაიმ ტაიმის” პრესკლუბში.
პრეზიდენტმა გიორგი მარგველაშვილმა უზენაესი სასამართლოს ახალი თავმჯდომარე ნინო გვენეტაძე თანამშრომლებს დღეს, ოფიციალურად წარუდგინა.
გვენეტაძემ პოსტი ათი წლით ჩაიბარა. იგი პარლამენტმა გასულ კვირას დაამტკიცა და მის კანდიდატურას 88 დეპუტატმა დაუჭირა მხარი.
პრეზიდენტის მიერ წარდგენილ კანდიდატს ხმა არ მისცეს ,,ნაციონალური მოძრაობის” წარმომადგენლებმა და უმრავლესობის წევრმა ზაქარია ქუცნაშვილმა, რომელსაც თავადაც სურდა უზენაესი სასამართლოს თავმჯდომარეობა.