შს მინისტრი ვახტანგ გომელაური გამოთქვამს მზადყოფნას ,,ნაციონალების” მიერ ორგანიზებული აქციის უსაფრთხოდ და მშვიდობიანად ჩასატარებლად.
გომელაური განცხადებით, მისი უწყება მაქსიმუმს გააკეთებს აქციის მონაწილეებს კომფორტული გარემოს შესაქმნელად.
"შინაგან საქმეთა სამინისტრო მზად არის, რომ უსაფრთხოდ ჩატარდეს აქცია. ასევე, ყველანაირად ვეცდებით, რომ გადაადგილება თუ იქნება, რაიონებიდან ჩამოსვლა - ეს ავტობუსი იქნება თუ მანქანები, როგორც წინაზე გავაკეთეთ და დავეხმარეთ, ავტოსადგომებს მოვუმზადებთ, რომ საცობები არ შეიქმნას და კომფორტულად გადაადგილდნენ. ჩვენ არ ველოდებით არანაირ ექსცესებს. მე ვფიქრობ, არც თვითონ აპირებენ ასეთი რაღაცის გაკეთებას. ჩაივლის ცივილიზებულად, წყნარად. ჩვენც მაქსიმალურად შევუქმნით კომფორტს", _ განაცხადა გომელაურმა.
დღეს, 21 მარტს ხელისუფლების გადადგომის მოთხოვნით, ,,ნაციონალების აქცია” თავისუფლების მოედანზე 16:00 საათზე გაიმართება.