ვიცე-პრემიერი კახა კალაძე აცხადებს, რომ შსს თანამშრომლის მიერ დეპუტატ გივი თარგამაძისთვის მასალების გადაცემის ფაქტზე შესაბამისმა სამსახურებმა მოკვლევა უნდა დაიწყოს.
,, ვფიქრობ, უნდა დაიწყოს მოკვლევა შესაბამისმა სამსახურებმამ თუ სისხლის სამართლის დანაშაული იკვეთება. აუცილებლად ყველა პირმა, ვინც ჩართული იყო ამ სიბინძურეში, უნდა აგოს პასუხი. არა აქვს მნიშვნელობა ეს პარლამენტის წევრი იქნება, უბრალო მოქალაქე, მთავრობის წევრი, კანონი არის ყველასთვის ერთი. ჩვენ იმისთვის ვიბრძვით, რომ კანონის უზენაესობა დგას ყველასა და ყველაფერზე მაღლა," - განაცხადა კალაძემ.
შსს-ს გენერალური ინსპექციის მიერ ჩატარებული სამსახურებრივი შემოწმების შედეგად დადგენილია იმ თანამშრომლის ვინაობა, რომელიც შსს-ს ბაზაში არსებულ დაცულ ინფორმაციას „ნაციონალური მოძრაობის“ წევრ გივი თარგამაძეს სისტემატურად აწვდიდა.
დადგინდა, რომ საპატრულო პოლიციის თანამშრომელი რუსლან ბაზიაშვილი თავისი კუთვნილი გენერირების მოწყობილობა „დიჯიპასი“-ს მეშვეობით სამინისტროს დაცულ კომპიუტერულ ბაზაში შევიდა, მოქალაქე რამაზ დევაძის შესახებ ინფორმაცია არასამსახურებრივად მოიძია და საზღვრის კვეთის ამსახველი ფოტომასალა გივი თარგამაძეს მიაწოდა. შემდგომ აღნიშნული ინფორმაცია ერთ-ერთმა ტელეკომპანიამ საკუთარი ეთერისთვის გამოიყენა. ასევე დადგინდა, რომ რუსლან ბაზიაშვილმა გივი თარგამაძეს შსს-ს დაცული ინფორმაცია სხვადასხვა პერიოდში არაერთხელ გადასცა.
შსს ინფორმაციით, გენერალური ინსპექციის დასკვნის საფუძველზე, რუსლან ბაზიაშვილი სამსახურიდან დათხოვნილია.
გენერალური ინსპექციის მიერ, შსს-ს ბაზაში დაცული ინფორმაციის გაცემის ფაქტზე, სამინისტროს რიგებიდან 9 თანამშრომელია დათხოვნილი.
