საქართველოს ექსპრეზიდენტი მიხეილ სააკაშვილი მისთვის ბრალის დამძიმებას აბსურდულსა და პოლიტიკურად მოტივირებულს უწოდებს.
,,ვფიქრობ, არავინ მსოფლიოში აღარ დარჩა არც ერთი ადამიანი, არც საქართველოს შიგნით ვისაც სერიოზულად შეუძლია ამაზე ლაპარაკი. საქართველოს ბიუჯეტი ჩვენ გავზარდეთ 11-ჯერ, ე.ი სახლში არაფერი არ წაგვიღია და ჩვენი მთავრობის უკლებლივ ყველა წევრს, რა თქმა უნდა, არ წაუღია. ის ხალხი ვინც გვადანაშაულებს არის ის ხალხი ვინც გაარღვია ბიუჯეტი, ვინც ყოველდღიურად იწერს პრემიებს და ფუფუნებაზე ფიქრობს, ვინც საქართველოში შეამცირა ინვესტიციები და ექსპორტი რამდენიმე ათეული პროცენტით. ამ ხალხის მხრიდან ასეთი ტიპის ბრალდებები არის უტიფრობა და ეს დაადასტურა არა ერთმა საერთაშორისო ორგანიზაციამ, უველა პასუხისმგებელმა საერთაშრისო დამკვირვებელმა. ეს ძველი ხრიკები საქმეს ვერ შცვლის, საჭიროა ხალხს მიხედონ. საჭიროა თავი დაანებონ იმას რითიც არიან ახლა დაკავებული”, _განცხადა სააკაშვილმა ბრიუსელში.
საქართველოს მთავარი პროკურატურის წარმოებაში არსებულ სისხლის სამართლის საქმეზე (ტელეკომპანია “იმედი”, მთაწმინდის პარკი, რუსთავის მეტალურგიული ქარხანა, 2007 წლის ნოემბრის მოვლენები) საქართველოს ყოფილ პრეზიდენტს მიხეილ სააკაშვილს 2015 წლის 13 მარტის დადგენილებით დაუზუსტდა ბრალდება, რომლის მიხედვით მ. სააკაშვილმა ძალადობისა და დაზარალებულის პირადი ღირსების შეურაცხყოფით, ჩაიდინა სამსახურეობრივი უფლებამოსილების გადამეტება, რამაც ფიზიკური და იურიდიული პირების უფლების, საზოგადოების და სახელმწიფოს კანონიერი ინტერესის არსებითი დარღვევა გამოიწვია, რაც გათვალისწინებულია საქართველოს სისხლის სამართლის კოდექსის 333-ე მუხლის მე-2 ნაწილით და ამავე მუხლის მე-3 ნაწილის „ბ“ და „გ“ ქვეპუქტებით - სასჯელის სახით ითვალისწინებს თავისუფლების აღკვეთას ვადით 5-დან 8 წლამდე.
ამავე სისხლის სამართლის საქმეზე, 2015 წლის 13 მარტის დადგენილებებით, დავით კეზერაშვილს, ზურაბ ადეიშვილსა და გიორგი უგულავას დაუმძიმდათ ბრალდებები, ხოლო ივანე მერაბიშვილს ბრალის დამძიმების გარეშე დაუზუსტდა ბრალდება, კერძოდ:
დავით კეზერაშვილის მიმართ გამოტანილი დადგენილებით დაზუსტდა ბრალის ფაქტობრივი გარემოებები, ასევე შეიცვალა დანაშაულის კვალიფიკაცია, საქართველოს სისხლის სამართლის კოდექსის 333-ე მუხლის მეორე ნაწილით, (სამსახურეობრივი უფლებამოსილების გადამეტება - 2007 წლის ნოემბრის, ტელეკომპანია “იმედისა” და რუსთავის მეტალურგიული ქარხნის ეპიზოდები), 194-ე მუხლის მესამე ნაწილის „ბ“ და „გ“ ქვეპუნქტებით (უკანონო შემოსავლების ლეგალიზაცია - ტელეკომპანია “იმედის” ეპიზოდი) - სასჯელის სახით ითვალისწინებს თავისუფლების აღკვეთას ვადით 9-დან 12 წლამდე.
ზურაბ ადეიშვილის მიმართ გამოტანილი დადგენილებით დაზუსტდა ბრალის ფაქტობრივი გარემოებები, ასევე შეიცვალა დანაშაულის კვალიფიკაცია, საქართველოს სისხლის სამართლის კოდექსის 333-ე მუხლის მესამე ნაწილის „ბ“ და „გ“ ქვეპუნქტებით. (სამსახურეობრივი უფლებამოსილების გადამეტება - ტელეკომპანია „იმედის“, 2007 წლის ნოემბრის ეპიზოდები) - სასჯელის სახით ითვალისწინებს თავისუფლების აღკვეთას ვადით 5-დან 8 წლამდე.
გიორგი უგულავას მიმართ გამოტანილი დადგენილებით დაზუსტდა ბრალის ფაქტობრივი გარემოებები, ასევე შეიცვალა დანაშაულის კვალიფიკაცია, საქართველოს სისხლის სამართლის კოდექსის 333-ე მუხლის პირველი ნაწილით (სამსახურეობრივი უფლებამოსილების გადამეტება - მთაწმინდის პარკის ეპიზოდი), სსკ-ის 25, 182-ე მუხლის მეორე ნაწილის „ა“ ქვეპუნქტითა და მესამე ნაწილის „ბ“ ქვეპუნქტით (გაფლანგვაში დახმარება - მთაწმინდის პარკის ქონების გაფლანგვის ეპიზოდი) და სსკ-ის 25, 194-ე მუხლის მესამე ნაწილის „ბ“ და „გ“ ქვეპუნქტებით (დახამრება უკანონო შემოსავლების ლეგალიზაციაში-ტელეკომპანია „იმედის“ ეპიზოდი) - სასჯელის სახით ითვალისწინებს თავისუფლების აღკვეთას ვადით 9-დან 12 წლამდე.
ივანე მერაბიშვილის მიმართ გამოტანილი დადგენილებით დაზუსტდა ბრალის ფაქტობრივი გარემოებები, ხოლო კვალიფიკაცია დარჩა უცვლელი - საქართველოს სისხლის სამართლის კოდექსის 333-ე მუხლის მესამე ნაწილის „ბ“ და „გ“ ქვეპუნქტები. (ტელეკომპანია „იმედის“, 2007 წლის ნოემბრისა და მთაწმინდის პარკში შეჭრის ეპიზოდები) - სასჯელის სახით ითვალისწინებს თავისუფლების აღკვეთას ვადით 5-დან 8 წლამდე.
