შერიგებისა და სამოქალაქო თანასწორობის საკითხებში სახელმწიფო მინისტრის პაატა ზაქარეიშვილის განცხადებით, რუსეთსა და ცხინვალის საოკუპაციო რეჟიმს შორის გაფორმებული ე.წ. ხელშეკრულებას არანაირი იურიდიული ძალა არ აქვს. როგორც მთავრობის სხდომის შემდეგ ზაქარეიშვილმა განაცხადა ის არის ფარატინა ქაღალდი.
,,ზოგადად არსებობს სამი ვარიანტი: პირველი - ვინმემ ცნოს ეს დოკუმენტი და ამას აკეთებს მხოლოდ რუსეთი და მხოლოდ ოსური მხარე, მეორე - შეიქმნას სიტუაცია თითქოს არაფერი ხდება, რასაც ადგილი ჰქონდა წინა ხელისუფლების დროს და მესამე - ეს საერთაშორისო საზოგადოების მხრიდან შეფასდეს როგორც უკანონო დოკუმენტი, რომელსაც არავითარი ძალა არ გააჩნია. სწორედ ამ ბერკეტს მივმართავთ ჩვენ, რადგან ეს არის სერიოზული ბერკეტი, რადგან აღნიშნულით ხდება ამ დოკუმენტის გაბითურება. მთელი მსოფლიო ცალსახად და მკაფიოდ ამბობს, რომ ეს არაფერი არაა, არ ცნობენ მას, ეს არის რაღაც ქაღალდი, რომელსაც ვიღაცებმა ხელი მოაწერეს", - აღნიშნა პაატა ზაქარეიშვილმა.
