ევროსაბჭოს ხელმძღვანელმა დონალდ ტუსკმა მეორე მსოფლიო ომში გამარჯვების 70-ე წლისთავის აღსანიშნავ ზეიმზე მოსკოვისგან მოწვევა მიიღო, თუმცა მასში მონაწილეობაზე უარი თქვა.
ამის შესახებ ტუსკმა დღეს პოლონურ გამოცემა Wyborcza-სთან ინტერვიუში განაცხადა.
,,მოსაწვევი მივიღე, მაგრამ არ წავალ. სამხედრო პარადზე იმ პირთან და აგრესორთან ერთად დასწრება, რომელიც აღმოსავლეთ უკრაინაში მშვიდობიანი მოსახლეობის წინააღმდეგ იარაღს იყენებს, ჩემგან, რბილად რომ ვთქვათ, ორაზროვანი იქნება.” - აღნიშნავს ტუსკი.
ცოტა ხნით ადრე, მოსკოვში 9 მაისის ღონისძიებებში მონაწილეობის მიღებაზე უარი გერმანიის კანცლერმა ანგელა მერკელმა და ბრიტანეთის პრემიერმა დევიდ ქემერონმაც განაცხადეს.
გამარჯვების დღისადმი მიძღვნილ საიუბილეო ზემზე მოსკოვში ჩასვლის სურვილი ჩეხეთის პრეზიდენტმა მილოშ ზემანმა, ვიეტნამის პრეზიდენტმა ჩიონგ ტან შანგმა და ჩრდილოეთ კორეის ლიდერმა კიმ ჩენ ინმა დაადასტურეს.
რუსული სააგენტოების ცნობით, 9 მაისს მოსკოვში ისრაელის პრეზიდენტ რეუვენ რივლინსაც ელოდებიან.
გამარჯვების დღის აღსანიშნავად კრემლმა მოსაწვევი მრავალი ქვეყნის პირველ პირს გაუგზავნა, მათ შორის როგორც დსთ-ს, ევროკავშირის, შანხაის თანამშრომლობის ორგანიზაციის ქვეყნებს და ანტიჰიტლერული კოალიციის წევრ-ქვეყნებს. ასევე ბრაზილიას, ინდოეთს, ჩინეთს და სამხრეთ აფრიკას.
