ოკუპირებული აფხაზეთის ხელისუფლება არ აპირებს გალის რაიონის მოსახლეობას აფხაზეთის მოქალაქეობა მოახვიოს თავს.
ამის შესახებ დღეს გალში შეკრებილ ქართველებს თავად რაულ ხაჯიმბამ მოახსენა.
მისი თქმით, მზადდება კანონპროექტი, რომლის ძალითაც აფხაზური პასპორტების გაცემისთვის საჭირო კანონიერი მექანიზმი შემუშავდება.
,,ჩვენ იმის წინააღმდეგი ვართ, რომ ჩვენი პასპორტები მოგახვიოთ თავს. გალის რაიონის მოსახლეობას უფლება აქვს, მოქალაქეობის შესახებ არჩევანი თავად გააკეთოს.” - აღნიშნა ხაჯიმბამ.
შეგახსენებთ, რომ 2013 წლის სექტემბერში, ოკუპირებული აფხაზეთის საპარლამენტო კომისიამ გალის, ტყვარჩელის და ოჩამჩირის რაიონების მოსახლეობაზე გაცემული აფხაზეთის მოქალაქის პასპორტები უკანონოდ ცნო, რის შემდეგაც უმეტესობას ეს დოკუმენტი ჩამოართვეს.
კომისიის გადაწყვეტილებას საფუძვლად ის არგუმენტი დაედო, რომ აფხაზეთის მოქალაქის პასპორტების მფლობელთა დიდი ნაწილი საქართველოს მოქალაქეები იყვნენ.