,,ნაციონალური მოძრაობის" წევრის ლევან ბეჟაშვილის განცხადებით, მთავრობის ადმინისტრაციაში სახელმწიფო რწმუნებულებთან, გამგებლებთან, მერებთან შეხვედრები ყოველდღიურად იმართება და მიმდინარეობს მზადება, რომ 21 მარტს რეგიონებიდან მოსახლეობა არ ჩამოვიდეს.
"ბოლო დღეების განმავლობაში მთავრობა პანიკის ნიშნებს ავლენს. კანცელარიაში ყოველდღიურად იმართება შეხვედრები სახელმწიფო რწმუნებულებთან, გამგებლებთან, მერებთან. მიმდინარეობს მზადება, რომ 21 მარტს რეგიონებიდან მოსახლეობა არ ჩამოვიდეს. ამისთვის სახელმწიფო ადმინისტრაცია მიმართავს ტყუილებს, რადგან სოფლის რწმუნებულები დადიან სოფლებში და მოსახლეობას არწმუნებენ, რომ აამუშავებენ სხვადასხვა სახელმწიფო პროგრამებს, როგორიცაა მიწების მოხვნის პროგრამა და სოფლის მეურნეობის სხვა პროექტების განხორციელება. კიდევ ერთხელ უნდა ვამხილოთ მთავრობა მორიგ ტყუილში და მოვუწოდოთ სოფლის მოსახლეობას, რომ რწმუნებულების ტყუილები არ დაიჯერონ, რადგან სახელმწიფო ბიუჯეტის შესახებ კანონში სათანადო მუხლებში ამ პროექტებისთვის დაფინანსება გამოყოფილი არ არის”, _აცხადებს ბეჟაშვილი.
შეგახსენებთ, რომ თბილისში, 21 მარტს მთავრობის გადადგომის მოთხოვნით საპროტესტო აქცია გაიმართება. აქცია "ერთიანი ნაციონალური მოძრაობის" ინიციატივით ვარდების მოედანზე ჩატარდება.
