აღმოსავლეთ უკრაინის კრიზისს ვერც რუსეთზე დაწესებული სანქციები და ვერც უკრაინის შეიარაღება ვერ დაარეგულირებს. ამის შესახებ გერმანიის საგარეო საქმეთა მინისტრმა განაცხადა. ფრანკ ვალტერ შტაინმაიერის თქმით, კონფლიქტის დარეგულირების ერთადერთი გზა დიალოგი და მინსკის შეთანხმების პირობების შესრულებაა. "მინსკის შეთანხმებით აღებული ვალდებულებების შესრულება რთული პროცესია და გარკვეული გართულებები ამ პროცესში შესაძლოა იყოს, თუმცა არც სანქციები და არც უკრაინის იარაღით მომარაგება კონფლიქტის დარეგულირებას ხელს არ შეუწყობს. პროცესში გარკვეული პროგრესი უკვე შეინიშნება. კიევმა და სეპარატისტებმა კონფლიქტის ხაზიდან მძიმე შეიარაღების გაყვანა დაიწყეს. მხარეები სწორი მიმართულებით მიდიან, მაგრამ ეს საკმარისი არ არის. ვიმედოვნებთ, რომ მძიმე იარაღის გაყვანა მინსკის შეთანხმების სხვა პირობების შესრულების წინაპირობა იქნება,"-აღნიშნა გერმანიის პირველმა დიპლომატმა.