უკრაინის საგარეო საქმეთა სამინისტრო რუსეთსა და თვითაღიარებულ სამხრეთ ოსეთის რესპუბლიკას შორის „სახელმწიფო საზღვრის შესახებ“ ე.წ. შეთანხმების ხელმოწერასთან დაკავშირებით განცხადებას ავრცელებს სადაც მითიოტებულია, რომ
,,უკრაინა მტკიცედ გმობს რუსეთსა და თვითაღიარებულ სამხრეთ ოსეთის რესპუბლიკას შორის (ცხინვალის რეგიონი, საქართველო) „სახელმწიფო საზღვრის შესახებ“ ე.წ. შეთანხმების ხელმოწერას და თვლის, რომ ეს არის ევროპის საერთაშორისოდ აღიარებული საზღვრების ძალადობრივი შეცვლის მორიგი მცდელობა.საქართველოს ტერიტორიული მთლიანობის და სუვერენიტეტის დარღვევა, ყირიმის ავტონომიური რესპუბლიკის ანექსია და უკრაინის აღმოსავლეთში მიმდინარე აგრესია უხეშად არღვევს საერთაშორისო სამართლის ნორმებსა და პრინციპებს, ძირს უთხრის სტაბილურობას აღმოსავლეთ ევროპისა და შავი ზღვის რეგიონებში, წარმოადგენს საფრთხეს სრულიად ევროპისათვის და იწვევს ათასობით ადამიანის დაღუპვას”,_ნათქვამია უკრაინის საგარეო უწყების განცხადებაში, რომელსაც საქრთველოს საგარეო საქმეთა სამინისტრო ავრცელებს.
ამასთან უკრაინა მოუწოდებს რუსეთის ფედერაციას შეწყვიტოს საერთაშორისო ურთიერთობებში რევიზიონიზმის მიზანმიმართული პრაქტიკა, უკანონო ფსევდო წარმონაქმნების პოლიტიკური, ეკონომიკური და სამხედრო მხარდაჭერა და დაუბრუნდეს გაერო-ს წესდების, ჰელსინკის შემაჯამებელი აქტის, ახალი ევროპისთვის პარიზის ქარტიის მკაფიო შესრულებას.
განცხადების თანახმად, უკრაინა ადასტურებს საერთაშორისოდ აღიარებულ საზღვრების ფარგლებში საქართველოს სუვერენიტეტისა და ტერიტორიულ მთლიანობის პატივისცემას და საერთაშორისო თანამეგობრობას მოუწოდებს არ დაუშვას ცხინვალის რეგიონისა და აფხაზეთის (საქართველო) ანექსია რუსეთის მიერ.
