საქართველოს საგარეო საქმეთა მინისტრი თამარ ბერუჩაშვილი პრაღაში დაგეგმილ აბაშიძე-კარასინის შეხვედრას ეხმიანება და აღნიშვს, რომ უნდა გამოვნახოთ გზები და მაქსიმალურად ვიმუშაოთ ჩვენი ინტერესების დასაცავად.
მისივე განცხადებით, რუსეთის ხელისუფლების მიერ საქართველოს ოკუპირებული რეგიონების დე ფაქტო რეჟიმებთან ე.წ. ინტეგრაციის ხელშეკრულებების გაფორმება აბაშიძე-კარასინის მოლაპარაკებების ფორმატის შეჩერების მთავარი მიზეზი იყო.
„პაუზა იყო სწორედ იმის გამო, რომ რუსეთმა გადადგა ეს ნაბიჯი, მაგრამ სიტუაცია არ შეიცვალა და არც შეიცვლება. სიტუაცია იქნება რთული, შესაძლოა კიდევ უფრო რთული, მაგრამ ჩვენ უნდა გამოვნახოთ გზები და მაქსიმალურად ვიმუშაოთ ჩვენი ინტერესების დასაცავად, თუნდაც ამ რთულ გარემოში,” - განაცხადა თამარ ბერუჩაშვილმა.
შეგახსენებთ, რომ საქართველოს პრემიერ-მინისტრის სპეციალური წარმომადგენელი რუსეთთან ურთიერთობის საკითხებში ზურაბ აბაშიძე რუსეთის საგარეო საქმეთა მინისტრის მოადგილეს გრიგორი კარასინს დღეს პრაღაში შეხვდება.
