მოხდება თუ არა მიკროსაფინანსო ორგანიზაციების მიერ დოლარში გაცემული სამომხმარებლო სესხების რესტრუქტურიზაცია ამ დროისათვის გაურკვეველია. როგორც სებ-ის პრეზიდენტმა განაცხადა, მისი კომპეტენცია, ხოლო კომერციულ ბანკებზე ვრცელდება.
”სამომხმარებლო სესხების უმეტესობა მოდის კომერციულ ბანკებზე ჩვენი კომპეტენცია ვრცელდება მხოლოდ კომერციულ ბანკებზე. მიკროსაფინანსო ორგანიზაციები არ რეგულირდება. ქართული კანონმდებლობის მიხედვით, ისინი მხოლოდ რეგისტრაციას ექვემდებარებიან”,- განაცხადა გიორგი ქადაგიძემ.
როგორც ცნობილია, სებ-ის პრეზიდენტის დავალებით საქართველოში მოქმედი კომერციული ბანკები სპეციალური გეგმის შემუშავებაზე მუშაობენ, რომლის მიხედვითაც იმ მსესხებლებს, რომელთაც კრედიტი დოლარში აქვთ, ხოლო შემოსავალი ლარში, მათი ვალის რესტრუქტურიზაცია მოხდეს.
სებ-ის პრეზიდენტი კომერციული ბანკის ხელმძღვანელებს დღეს შეხვდა და მიმდინარე მაკრო-ეკონომიკური მდგომარეობა მათთან ერთად განიხილა.
”საბანკო სექტორის წარმომადგენლებთან ერთად გავიარეთ სხვადასხვა საკითხები, მათ შორის ყველაზე მნიშვნელოვანი: როგორც შევუმსუბუქოთ ტვირთი მოსახლეობის იმ ნაწილს, რომელსაც სესხი დოლარში აქვს და შემოსავალი კი ლარში. ბანკებს დავავალე, რომ ერთი კვირის განმავლობაში წარმოადგინონ გეგმები თუ რა მიდგომები ექნებათ მათ ასეთ კლიენტებთან და ასევე იყვნენ მაქსიმალურად მოქნილები. საუბარია სესხის ვადიანობის გაგრძელებაზე და სხვა ტიპის რესტრუქტურიზაციაზე იმისათვის, რომ ყოველთვიური სესხის მომსახურების თანხა შემცირდეს, რათა რაღაცა ტიპის შვება იგრძნონ იმ ადამიანებმა, ვისაც სესხი აქვს დოლარში და შემოსავალი ლარში. ჩვენ კარგად გვესმის, რომ ეს არ არის საკითხის ფუნდამენტური მოგვარება, მაგრამ იქამდე ვიდრე სავალუტო შემოდინებები აღსდგება და ფუნდამენტური ფაქტორები გამოსწორდება, როდესაც ლარს ექნება გამყარების ტენდენცია იქამდე ეს იქნება შვება ამ ადამიანებისათვის.
ყველა ბანკი იქნება ძალიან მოქნილი, და საბოლოო შედეგს 1 კვირის შემდგომ მოგახსენებთ, რადგანაც ბანკებს ერთ კვირიანი სამუშაო ვადა მივეცი”, - აღნიშნა შეხვედრის შემდეგ გიორგი ქადაგიძემ.