ადამიანის უფლებათა დაცვისა და სამოქალაქო ინტეგრაციის კომიტეტში პირობით ვადამდე გათავისუფლებული პირების საქმეთა შესწავლის მიზნით, სამუშაო ჯგუფი შეიქმნება. აღნიშნულთან დაკავშირებით განცხადება, ადამიანის უფლებათა დაცვისა და სამოქალაქო ინტეგრაციის კომიტეტის დღევანდელ სხდომაზე გაკეთდა.
კომიტეტის თავმჯდომარის, ეკა ბესელიას ინფორმაციით, სამუშაო ჯგუფში კომიტეტის წევრების გარდა იურდიულ საკითხთა კომიტეტი, სახალხო დამცველის ოფისი და სასჯელაღსრულებისა და პრობაციის სამინისტროც ჩაერთვება.
კომიტეტის წევრები გუშინდელ საკომიტეტო სხდომაზე განხილულ საკანონმდებლო პაკეტთან დაკავშირებულ დასკვნის პროექტსაც გაეცნენ. კომიტეტის თავმჯდომარემ ,,პატიმრობის კოდექსში ცვლილებების შეტანის შესახებ“ და მისგან გამომდინარე კანონპროექტის პაკეტზე ვრცელი დასკვნა წარმოადგინა, რომელშიც დეტალურად იქნა ასახული ყველა ის შენიშვნა და მოსაზრება, რაც კომიტეტის მიერ აღნიშნულ ცვლილებებთან დაკავშირებით იყო გამოთქმული.
ეკა ბესელიამ კანონპროექტის პაკეტის ავტორთა მიერ გაზიარებულ შენიშვნებზეც ისაუბრა და პარლამენტში წარმოდგენილი დოკუმენტი ადამიანის უფლებათა დაცვის კუთხით დადებითად შეაფასა.
კომიტეტის წევრებმა საკანონმდებლო პაკეტში შემავალ კანონპროექტებს კენჭი უყარეს და მათ პლენარულ სხდომაზე გატანას მხარი დაუჭირეს.
