საქართველოს 2015 წლის სახელმწიფო ბიუჯეტის მიხედვით მიმდინარე წელს სახელმწიფო საგარეო ვალის 1,010 მლნ ლარით, ხოლო საშინაო ვალის 600 მლნ ლარით ზრდაა დაგეგმილი. არასამთავრობო ორგანიზაცია ”საზოგადოება და ბანკების” ინფორმაციით, ეს მაჩვენებელი ჯამში (1,610 მლნ ლარი) 26 მლნ ლარით ნაკლებია წინა წლის ანალოგიურ (1, 636 მლნ ლარი) მაჩვენებელზე.
”ვინაიდან სახეზეა ეროვნული ვალუტის მკვეთრი გაუფასურება და გაუარესებული ეკონომიკური მოლოდინები, ამიტომ მთავრობამ მიმდინარე წელს დამატებით, ახალი საგარეო ვალის აღება და მისი ინფრასტრუქტურული პროექტებისკენ მიმართვა გადაწყვიტა.
როდესაც ვსაუბრობთ სახელმწიფო ვალზე განსაკუთრებით სამი ფაქტორია გასათვალისწინებელი: ვალის მდგრადობა, გადახდისუნარიანობა და ის თუ რამდენად ეფექტიანად ხდება მისი გამოყენება”, - აცხადებენ არასამთავრობო ორგანიზაციაში.
”საზოგადოება და ბანკების” ინფორმაციითვე, სახელმწიფო ვალის მდგრადობის განმსაზღვრელი ყველაზე კარგი ინდიკატორი მისი ნომინალურ მშპ-თან პროცენტული თანაფარდობაა. საქართველოს პარლამენტის მიერ 2011 წელს მიღებული „ეკონომიკური თავისუფლების აქტის'' მიხედვით, სახელმწიფო ვალი მშპ-ს 60%-ს არ უნდა აღემატებოდეს. მონაცემებიდან ნათელია, რომ 2015 წელს ეს მაჩვენებელი 37.1%-ს ფარგლებშია განსაზღვრული, რაც ჯერჯერობით ლიმიტის ფარგლებშია და ამ ეტაპზე საგანგაშო არ არის.
”რაც შეეხება ვალის გადახდისუნარიანობას, 2008 წლიდან მოყოლებული ქვეყანა გეგმით გათვალისწინებულ ვალდებულებებს მეტწილად დროულად იხდიდა. (2008 - 99.2%, 2009 - 98.6%, 2010 - 97.9%, 2011-99.9%, 2012-96.7% და 2013-96%).
მესამე და ყველაზე მნიშვნელოვანი ფაქტორი ვალის რაციონალურ ხარჯვაა. მთავარია ვალი ეფექტიანად იყოს გამოყენებული და ისეთი აქტივობების დასაფინანსებლად მიიმართოს, რაც შემდგომ მაღალ უკუგებას მოიტანს.
დღეს, დამატებით ასაღები ახალი საგარეო ვალის ეფექტიანობა, კვლავ მის რაციონალურ ხარჯვაზე იქნება დამოკიდებული. მნიშვნელოვანია ამ ვალით მაღალი ეფექტიანობის მქონე ინფრასტრუქტურული პროექტები დაფინანსდეს, რაც შემდგომ ქვეყნისთვის დიდი უკუგების მომტანი იქნება. ასეთ შემთხვევაში ვალის ამ სახით ხარჯვა მყისიერად არა, მაგრამ საშუალოვადიან პერიოდში ეკონომიკაზე უკვე დადებითად აისახება”, აცხადებენ ”საზოგადოება და ბანკებში”.
