ბოლო დღეებში შემოსავლების სამსახურის თანამშრომლებმა საქართველოს საბაჟო საზღვარზე ნარკოტიკული და ფსიქოტროპული ნივთიერებების შემოტანის რამდენიმე ფაქტი აღკვეთეს.
შემოსავლების სამსახურის ინფორმაციით, 12 თებერვალს საბაჟო გამშვები პუნქტის „სადახლო-საავტომობილოს" ტერიტორიაზე, სომხეთის რესპუბლიკის მხრიდან შემოვიდა სომხეთის მოქალაქე ს.მ., რომლის კუთვნილი ავტომანქანის დათვალიერების შედეგად მებაჟე ოფიცრებმა 1,45 გრ. ნარკოტიკული ნივთიერება „მარიხუანა" აღმოაჩინეს. საქმე შემდგომი რეაგირების მიზნით გადაეცა შსს საპატრულო პოლიციის დეპარტამენტის ქვემო ქართლის მთავარ სამმართველოს.
2 კაფსულა ფსიქოტროპული ნივთიერების შემცველი მედიკამენტი LYRICA აღმოაჩინეს მებაჟე ოფიცრებმა, 16 თებერვალს, „სადახლო-საავტომობილოს" ტერიტორიაზე სომხეთის მოქალაქე ზ.ა.-ის კუთვნილი ხელბარგის დათვალიერებისასაც. საქმე შემდგომი რეაგირებისათვის გადაეცა საპატრულო პოლიციის ქვემო ქართლის მთავარი სამმართველოს საგამოძიებო სამსახურს.
ასევე ფსიქოტროპული ნივთიერების შემცველი მედიკამენტი LYRICA - 12 კაფსულა - აღმოჩნდა 13 თებერვალს, სგპ „თბილისის აეროპორტში", ერაყის მოქალაქე ნ.ა.ს.-ის კუთვნილ ხელბარგში. საქმე შემდგომი რეაგირებისათვის გადაეცა შსს ისანი-სამგორის სამმართველოს პოლიციის მე-6 განყოფილებას.