,,ჭიკაიძის გადადგომა საკმარისზე მეტი ნიშანი იყო იმისთვის, რომ გვეფიქრა, იური ვაზაგაშვილის საქმის გახსნა არ მოხდება. თუმცა პროკურატურა უფრო ,,მყარი" და ,,მედგარი" ინსტიტუტია ქვეყანაში და არა მგონია, მთავარი პროკურორის თავი გაგორდეს თუ ეს საქმე არ გაიხსნა, მაგრამ საზოგადოებაში კრიზისს აუცილებლად გამოიწვევს. უკვე შეიქმნა შთაბეჭდილება, რომ ამ ქვეყნის მოქალაქეები სრულიად დაუცველები ვართ. მე პირადად მაქვს განცდა, რომ ტყუილიად ვინახავთ პროკურატურას, საგამოძიებო ორგანოებს, ტყუილად გვყავს ეს ხალხი სამსახურში და ტყუილად ვუხდით ხელფასს, რადგან თავის ფუნქციას ვერანაირად ვერ ასრულებენ", _განაცხადა ,,ჯი-ეიჩ-ენთან" საუბარში მუხაშავრიამ.

კითხვაზე რა შეუშლის იური ვაზაგაშვილის საქმის გახსნას ხელისუფლების მხრიდან არასათანადო მზაობა, თუ კომპეტენტური კადრების არარსებობა მუხაშავრია განმარტავს:

,,სამწუხაროდ, არც ერთია და არც მეორე. ხელისუფლების ნება რომ იყოს ეყოლებოდა კომპეტენტური და კვალიფიციური გამომძიებლები, რომლებსაც არ გაუჭირდებოდათ ასეთი საქმის გახსნა, ხოლო მეორე მხრივ დარწმუნებული ვარ, პროკურატურის საბოტაჟი გრძელდება და ხელისუფლება მას ვერ უვლის, ამის გამო, საგამოძიებო ორგანო თვითნებობს და თვითნებობას იქამდე გააგრძელებს სანამ ამის შესაძლებლობა ექნება", _აცხადებს ლია მუხაშავრია.

შეგახსენებთ, რომ იური ვაზაგაშვილი 20 იანვარს, შვილის, ზურაბ ვაზაგაშვილის საფლავზე გარდაცვლილი იპოვნეს. ის აფეთქების შედეგად დაიღუპა. აღნიშნულ ფაქტთან დაკავშირებით მთავარმა პროკურატურამ გამოძიება სისხლის სამართლის კოდექსის 109-ე მუხლით დაიწყო, რაც დამამძიმებელ გარემოებაში განზრახ მკვლელობას გულისხმობს.

იური ვაზაგაშვილი წლების მანძილზე ითხოვდა 2006 წელს, სპეცოპერაციის შედეგად დაღუპული შვილის, ზურაბ ვაზაგაშვილის საქმის გამოძიებას, რომელიც ამ დრომდე არ არის დასრულებული.