ვიცე-პრემიერი კახა კალაძე მორიგ საკადრო ცვლილებებს ხელისუფლების უკეთესად მუშაობით ხსნის და აცხადებს, რომ აღნიშნული ქმედება უკეთესობისკენ გადადგმული ნაბიჯია.
,,მე ვფიქრობ, ეს ყველაფერი არის განპირობებული იმით, რომ ჩვენ უკეთესად ვიმუშაოთ. მოკლედ რომ ვთქვა, ეს არის სწრაფვა უკეთესობისკენ", - აღნიშნა კახა კალაძემ.
შეგახსენებთ, რომ პრემიერმა მორიგი საკადრო ცვლილებები განახორციელა.
,,ჩვენ დავასრულეთ შიდაუწყებრივი გადაადგილებები. ბატონი გიორგი ზედელაშვილი, რომელიც იყო შს მინისტრის მოადგილე, დაინიშნა უსაფრთხოებისა და კრიზისების მართვის საბჭოს მდივნის მოადგილედ. ჩვენ მივიღეთ კანონი უსაფრთხოებისა და კრიზისების მართვის საბჭოს შესახებ და გვაქვს სურვილი, მაქსიმალურად გავაძლიეროთ ეს უწყება. როგორც გუშინ ვაცნობე საზოგადოებას, ვიწყებთ შს სამინისტროს რეფორმირებას, უსაფრთხოების სამსახურის გამოყოფას შინაგან საქმეთა სამინისტროსგან. ვფიქრობ, განხორციელებული საკადრო ცვლილებები ამ პროცესს დაეხმარება. ბატონი ვახტანგ გომელაური დაინიშნება შს მინისტრის პირველ მოადგილედ, ასევე მინისტრის მოადგილედ ინიშნება თეიმურაზ მღებრიშვილი, რომელიც იყო სახელმწიფო დაცვის სპეციალური სამსახურის უფროსი. ანზორ ჩუბინიძე კი დავაბრუნეთ სახელმწიფო დაცვის სამსახურის უფროსად. კიდევ ერთი ცვლილება გახლავთ ის, რომ სასჯელაღსრულების მინისტრის მოადგილე არჩილ თალაკვაძე დაინიშნება შს მინისტრის მოადგილედ. ეს არის ის ცვლილებები, რომელიც განვახორციელეთ გუშინ,"- აღნიშნა ირაკლი ღარიბაშვილმა.
მასალის გამოყენების პირობები