ყოფილი სახელმწიფო მინისტრი და ,,თავისუფალი დემოკრატების" ერთ-ერთი ლიდერი ალექსი პეტრიაშვილი ცხინვალის დე ფაქტო პრეზიდენტის ლეონიდ თიბილოვის განცხადებას სოციალურ ქსელში ეხმიანება და აცხადებს, რომ ამ ფონზე აუცილებელია საჭიროა პირდაპირი კონტაქტები დასავლეთის ლიდერებთან არა რუსეთის ქმედების დაგმობის მიზნით, არამედ საჭიროა საუბარი საქართველოს ნატოში დაჩქარებულად გაწევრიანებაზე!
,,რუსეთი არ ჩერდება! არც გაჩერდება! აფხაზეთის ანექსიისკენ გადადგმულ ნაბიჯს ცხინვალის რეგიონის პირდაპირი ანექსია მოსდევს! ვერც დაგმობა აჩერებს ჩვენი მიწაწყლის მიტაცებას და ვერც სავაჭრო ურთიერთობები! საჭიროა პირდაპირი კონტაქტები დასავლეთის ლიდერებთან, და თანაც არა დაგმობის თხოვნა/მოთხოვნის თემაზე! საჭიროა საუბარი საქართველოს ნატოში დაჩქარებულად გაწევრიანებაზე! რუსეთი ამ პროცესს არ შეაჩერებს! რუსეთის ჩამოშლის ლოდინი გულუბრყვილოა და ამ გულუბრყვილობაში პირველ რიგში დასავლელ ლიდერებს მოვიაზრებ, მაგრამ ჩვენ მათ, ყველამ ერთად უნდა ავუხსნათ, რომ კიდევ უფრო უარესის თავიდან ასაცილებლად ნატომ უნდა მიიღოს გადაწყვეტილება ნატოში საქართველოს გაწევრიანებაზე და მისმა წევრმა ქვეყნებმა თავდაცვითი საშუალებების მოწოდებაზე! რას ველოდებით? რომ გაიფორმებს, თუნდაც არალეგიტიმურად, რუსეთი და მერე გვექნება სათქმელი დასავლეთთან? თუ, რუსეთს აღარ ეყოლება ვ.პუტინი და სანამ გონს მოვლენ, დასავლეთი ივაჟკაცებს? იმისთვის, რომ ეს უკანასკნელიც კი მოხდეს, საჭიროა დღეს, უფრო სწორად გუშინ პირდაპირი კონტაქტი! კონგრესის რეზოლუცია მაგარია, მაგრამ კონკრეტულ საკითხებს აშშ-ს პრეზიდენტი წყვეტს. შტაინმაიერი დიდი ქვეყნის საგარეო საქმეთა მინისტრია, მაგრამ გლობალურ საკითხებს ქ-ნი ა.მერკელი წყვეტს! აიღეთ ტელეფონი და დაურეკეთ!", -აცხადებს პეტრიაშვილი.
,,მსოფლიოში განვითარებული პოლიტიკური პროცესები იმის აუცილებლობას გვკარნახობს, რომ სამხრეთ ოსეთსა და რუსეთს შორის თანამშრომლობის ახალ ხელშეკრულებას მოვაწეროთ ხელი." - განაცხადა ცხივლის დე ფაქტო პრეზიდენტმა ლეონიდ თიბილოვმა.
მისი თქმით, ამ დროისთვის მომავალ ხელშეკრულებასთან დაკავშირებით უკვე არსებობს მრავალი წინადადება, რომელიც რუს კოლეგებთან კონსულტაციების შედეგად მიიღეს.
მოლაპარაკებები ამ საკითხზე, ძირითადად, ოკუპირებულ სამხრეთ ოსეთში სამუშაო ვიზიტით, ორი დღის წინ ჩასულმა რუსეთის პრეზიდენტის წარმომადგენელმა ოლეგ გოვორუნმა აწარმოა.
,,ჩვენ უკვე შევუდექით ახალ ხელშეკრულებაზე მუშაობას. სამხრეთ ოსეთის მხარის ექსპერტებს რუსეთის მხარის წარმომადგენლებთან ერთად კონსულტაციების გამართვა დაევალათ. მე გამოვედი წინადადებით, რომ ხელშეკრულების ახალ პროექტში განხილული იყოს სამხრეთ ოსეთის შესვლა რუსეთის ფედერაციის ფარგლებში, როგორც პირდაპირი ფორმით, ასევე სხვა გზებითაც, რაც გზებიც დღეს მსოფლიო პრაქტიკაში არსებობს. ვფიქრობ, ამ საკითხზე მალე მივიღებთ სათანადო პასუხს." - აღნიშნა თიბილოვმა